চুবুৰীয়া অৰুণাচলৰ লগতে উত্তৰ অসমত পুনৰ নীপকোৱে এৰি দিয়া বান্ধৰ পানীয়ে মহাপ্ৰলয় সৃষ্টি কৰাৰ আশংকা গভীৰ হৈ পৰিছে।ৰঙানদীৰ বান্ধত আবদ্ধ হৈ থকা বালি আৰু পলসে নদীখন মুহূৰ্ততে পুতি পেলোৱাৰ উপৰি নৈপৰীয়া উত্তৰ অসমৰ গাঁওসমূহলৈ দুৰ্যোগ কঢ়িয়াই অনাৰ আশংকা প্ৰবল হৈ পৰিছে।
অৰুণাচলৰ নামনি সোৱণশিৰি জিলাৰ ৰঙানদীৰ বৃহৎ জলবিদ্যুৎ প্ৰকল্পটো মেৰামতিৰ বাবে নীপকো কৰ্তৃপক্ষই তিনি মাহলৈ সাময়িকভাৱে উৎপাদন বন্ধ কৰি দিব। সেই অনুসৰি ৰঙানদী বান্ধটো মেৰামতিৰ বাবে পহিলা ফেব্ৰুৱাৰিৰ পৰা তিনি মাহলৈ উৎপাদন বন্ধ কৰি দিয়া সন্দৰ্ভত এখন জাননী জাৰি কৰিছে।
উক্ত জাননীখনে অৰুণাচল প্ৰদেশৰ নামনি অঞ্চলৰ লগতে উত্তৰ অসমৰ নৈপৰীয়া ৰাইজলৈ কঢ়িয়াই আনিছে তীব্ৰ আতংক। কিয়নো নীপকোৰ ৰঙানদী বান্ধ ‘নিৰ্জলাকৰণ’ সিদ্ধান্তই নিশাৰ ভিতৰতে সমগ্ৰ উত্তৰ অসমত বানৰ মহাপ্ৰলয় সৃষ্টি কৰাটো নিশ্চিত হৈ পৰিছে।
ৰঙানদীত এৰি দিয়া পানীয়ে প্ৰতিবছৰেই উত্তৰ অসমত সৃষ্টি কৰি অহা মহাপ্ৰলয়ৰ প্ৰতি লক্ষ্য ৰাখি উত্তৰপৰীয়া ৰাইজ শংকিত হৈ পৰিছে।
আনহাতে, নীপকোৱে এইবাৰ মেৰামতিৰ বাবে বান্ধৰ জমা পানী মাত্ৰ চাৰি দিনৰ ভিতৰত ৰঙানদীত এৰি দিবলৈ সাজু হৈছে। বান্ধত জমা হৈ থকা বালি-পলস আৰু পানী ৰঙানদীলৈ এৰি দিলে স্বাভাৱিক পৰিমাণতকৈ পানী বৃদ্ধি পাব বুলি উল্লেখ কৰিছে নীপকোৱে।কিন্তু সেই পানী কিমান বৃদ্ধি পাব তাক স্পষ্ট নকৰাত অৰুণাচলৰ নামনি অঞ্চলৰ উপৰি উত্তৰ অসমৰ নৈপৰীয়া ৰাইজ আতংকিত হৈ পৰিছে।
ইপিনে, মেৰামতিৰ সময়ছোৱাত ঘৰচীয়া জীৱ-জন্তুৰ লগতে নৈপৰীয়া ৰাইজক ৰঙানদী আৰু ডিক্ৰঙৰ পাৰলৈ নাযাবলৈ নীপকো কৰ্তৃপক্ষই সতৰ্ক কৰি দিছে। তদুপৰি, উক্ত সময়ছোৱাত কিবা দুৰ্ঘটনা হ’লে নীপকো কৰ্তৃপক্ষ দায়ী নহয় বুলিও জাননীখনত স্পষ্ট কৰি দিছে। নীপকো কৰ্তৃপক্ষৰ উক্ত জাননীৰ পাছতেই চুবুৰীয়া ৰাজ্যখনৰ বিভিন্ন সংগঠনে নীপকোৰ ওপৰত জাঙুৰ খাই উঠিছে।
আনহাতে, অগপৰ যুৱ নেতা তুলাৰাম গগৈয়ে শীঘ্ৰেই অসম চৰকাৰক নীপকোৰ সৈতে যোগাযোগ কৰি উত্তৰ অসমৰ নৈপৰীয়া ৰাইজৰ জীৱন-সম্পত্তিৰ সুৰক্ষা নিশ্চিত কৰাৰ দাবী জনাইছে।
