ৰূপালী জয়ন্তী বৰ্ষত ভৰি দিলে প্ৰয়াত বিশিষ্ট সাংবাদিক তথা একালৰ প্রখ্যাত তাৰ্কিক পৰাগ কুমাৰ দাসৰ সোঁৱৰণত অনুষ্ঠিত হৈ অহা সদৌ অসম তৰ্ক প্রতিযোগিতা। বিশিষ্ট সাংবাদিকগৰাকীৰ সোঁৱৰণত ১৯৯৭ চনৰে পৰা নিয়মীয়াকৈ অনুষ্ঠিত হৈ অহা এই তৰ্ক প্রতিযোগিতাখন এইবছৰেই অন্তিমবাৰলৈ অনুষ্ঠিত হ’ব৷
২০২২ বৰ্ষৰ পৰা এই তৰ্ক প্রতিযোগিতাখনৰ পৰিবৰ্তে বিশিষ্ট সাংবাদিকজনৰ সোঁৱৰণত অনুষ্ঠিত হ’ব একোটা বাৰ্যিক বক্তৃতানুষ্ঠান। সেই অনুসৰি অন্তিমবাৰলৈ এই ২৫ সংখ্যক পৰাগ কুমাৰ দাস সোঁৱৰ সদৌ অসম আন্তঃমহাবিদ্যালয় তৰ্ক প্ৰতিযোগিতাখন অহা ২১ নৱেম্বৰ দেওবাৰে দিনৰ এঘাৰ বজাৰ পৰা মহানগৰীৰ ৰবীন্দ্ৰ ভৱন প্ৰেক্ষাগৃহত অনুষ্ঠিত কৰাৰ বাবে আয়োজকে সিদ্ধান্ত গ্ৰহণ কৰিছে।
অন্তিমবাৰৰ এই প্রতিযোগিতাৰ বিষয় হৈছে— ‘কেৱল অধিক ক্ষমতা কেন্দ্ৰীভূত কৰাৰ স্বাৰ্থতে কেন্দ্রীয় চৰকাৰ উত্তৰ-পূব ভাৰতৰ আন্তঃৰাজ্যিক সীমা বিবাদ সমাধানত আগ্ৰহী নহয়’ (Solely for centralizing morepower, the union government is not interested in resolution of the inter-state border disputes of north-east of India)।
পূৰ্বৰ দৰেই প্ৰতিযোগীসকলে অসমীয়া আৰু ইংৰাজী দুয়োটা ভাষাতে প্রতিযোগিতাত অংশগ্ৰহণ কৰিব পাৰিব।
প্রতিখন মহাবিদ্যালয় আৰু বিশ্ববিদ্যালয়ৰ পৰা দুজনকৈ প্রতিযোগীয়ে (এজন সপক্ষে, আনজন বিপক্ষে) অংশগ্ৰহণ কৰাটো বাধ্যতামূলক প্রতিজনে বক্তব্য দাঙি ধৰাৰ বাবে পাঁচ মিনিটকৈ সময় লাভ কৰিব।
অসমৰ বিশিষ্ট সাংবাদিক তথা একালৰ বিশিষ্ট তাৰ্কিক পৰাগ কুমাৰ দাসৰ সোঁৱৰণত ১৯৯৭ চনৰ পৰা প্রতিবছৰে সদৌ অসম ভিত্তিত মহাবিদ্যালয় আৰু বিশ্ববিদ্যালয়ৰ ছাত্ৰ-ছাত্ৰীসকলৰ মাজত এই তৰ্ক প্রতিযোগিতাখন অনুষ্ঠিত হৈ আহিছে। প্রতিটো দলে সংশ্লিষ্ট মহাবিদ্যালয়-বিশ্ববিদ্যালয়ৰ মুৰৰী তথা তৰ্ক বিভাকৰ ভাৰপ্ৰাপ্ত প্ৰবক্তা-অধ্যাপকৰ পৰা প্ৰতিযোগিতাত অংশগ্ৰহণৰ বাবে প্রমাণপত্ৰ আনিব লাগিব।
প্রতিযোগিতাত প্রথম তিনিটা স্থানত দলগতভাৱে বিজয়ী মহাবিদ্যালয়, বিশ্ববিদ্যালয়কেইখনে স্মাৰকসহ পৰাগ কুমাৰ দাস সোঁৱৰণী চলন্ত ট্ৰফী আৰু ব্যক্তিগতভাৱে প্রথম তিনিটা স্থান দখল কৰা শ্ৰেষ্ঠ তাৰ্কিক তিনিজনে স্মাৰকসহ ক্ৰমে পোন্ধৰ হেজাৰ, দহ হেজাৰ আৰু সাত হেজাৰ নগদ ধন লাভ কৰিব। সেইদিনাই এখন আটকধুনীয়া স্মৰণিকাও প্রকাশ পাব, য’ত তৰ্ক প্রতিযোগিতাখনৰ পঁচিশ বছৰীয়া ইতিহাস সংৰক্ষিত হৈ থাকিব।
‘সাদিন-প্রতিদিন গোষ্ঠী’ৰ পৃষ্ঠপোষকতাত অনুষ্ঠিত হৈ অহা এই পৰাগ কুমাৰ দাস সোঁৱৰণী সদৌ অসম আন্তঃমহাবিদ্যালয় তৰ্ক প্রতিযোগিতা সমিতিৰ সভাপতি উদয়াদিত্য ভৰালী আৰু সাধাৰণ সম্পাদক পৰম প্রকাশ গগৈয়ে অসমৰ সকলো মহাবিদ্যালয়, বিশ্ববিদ্যালয়ক প্রতিযোগিতাত অংশগ্ৰহণৰ বাবে আমন্ত্ৰণ জনাইছে আৰু ইচ্ছুকসকলে ৯৪৩৫০-৪৪১৪০, ৯৪৩৫০-৪৮২৬৮ নম্বৰত যোগাযোগ কৰিবলৈ আহ্লান জনাইছে।
