নলবাৰীত ‘কা’ মানি নোলোৱাৰ হুংকাৰেৰে ভোগালী বিহু উদযাপনৰ প্ৰস্তুতি
‘কা’ আমি নামানো ৰাজ্যৰ চৌদিশে এতিয়া এই শ্ল’গান। সকলো দল-সংগঠন তথা সাধাৰণ জনসাধাৰণ ‘কা’ৰ বিৰোধিতা কৰি ইয়াক বাতিলৰ দাবী জনাইছে। সমান্তৰালভাৱে সমাগত অসমীয়াৰ স্নেহৰ ভোগালী বিহু।
অসমৰ জনসাধাৰণে এইবাৰ ‘কা’ বিৰোধিতাৰে ভোগালী বিহু উদযাপন কৰিব। আন ঠাইৰ দৰে নলবাৰীৰ শান্তিপুৰৰ একাংশ স্বাভিমানী মহিলাই নাগৰিকত্ব (সংশোধন) আইনৰ বিৰোধিতাৰে ব্যতিক্ৰমী প্ৰতিবাদ সাব্যস্ত কৰিছে।
মহিলাসকলে আগন্তুক ভোগলী বিহুলৈ বুলি পিঠা-লাড়ু আদি প্ৰস্তুত কৰিছে। পিঠা-পনা প্ৰস্তুত কৰা ঠাইত “কা’ আমি নামানো, ‘কা’ বাতিল কৰক” আদি শ্ল’গান আঁৰি লৈছে। কথা এটাই ‘কা’ আমি নামানো, বিহুও পাতিম আৰু ‘কা’ৰ বিৰোধিতাৰে প্ৰতিবাদো কৰিম।
প্ৰতিবাদী মহিলাসকলে সংবাদমাধ্যমৰ আগত কয় যে জাতি ধ্বংসী নাগৰিকত্ব (সংশোধন) আইন কোনো কাৰণতে মানি লোৱা নহ’ব। লগতে মুখ্য মন্ত্ৰীকো জাতিৰ প্ৰতি দায়বদ্ধতা দেখুৱাই কেন্দ্ৰীয় চৰকাৰক ‘কা’ বাতিল কৰিবলৈ দাবী জনাবলৈ কয়।
একেদৰে নলবাৰীৰ বিভিন্ন ঠাইত স্থানীয় ৰাইজে ভোগালী বিহু উদযাপনৰ উদ্দেশ্যে ভেলা ঘৰ সাজিছে আৰু ‘কা’ মানি নোলোৱাৰ হুংকাৰ দিছে।