বাঘজানৰ গেছ খাদৰ বিধ্বংসী জুইৰ পাছত কেইবাটাও জোকাৰণিত আতংকিত ৰাইজ
তিনিচুকীয়া জিলাৰ ভাৰতীয় তেল নিগমৰ গেছ খাদত সংঘটিত বিধ্বংসী অগ্নিকাণ্ডৰ পাছতে বৃহস্পতিবাৰে বাঘজান আৰু নতুন গাঁও অঞ্চলত কেইবাটাও মজলীয়া ধৰণৰ জোকাৰণি অনুভুত হয়।
তিনিচুকীয়া জিলাৰ বাঘজানৰ ভাৰতীয় তেল নিগমৰ ৫ নম্বৰ খাদত যোৱা ২৭ মে’ৰ পৰা নিয়ন্ত্ৰণহীনভাৱে গেছ নিৰ্গত হৈ আছিল আৰু মঙলবাৰে বিয়লি জুই লাগে আৰু বিধ্বংসী ৰূপ লোৱাৰ লগতে তাত কৰ্তব্যৰত দুগৰাকী তেল নিগমৰ অগ্নিনিৰ্বাপক কৰ্মীৰ মৃত্যু হয়।
জোকাৰণি অনুভুত হোৱাৰ পাছতে অঞ্চলটোৰ বাসিন্দাসকল আতংকিত হৈ পৰিছে আৰু ঘৰবাৰী এৰি পলাইছে।
‘’বিগত ২৪ ঘন্টাত আমাৰ অঞ্চলত একেৰাহে জোকাৰণি অনুভুত হৈছিল। আমাৰ ঘৰবোৰ কেইবাঘন্টা ধৰি কঁপি আছিল। আমি ভাৱিছিলো যে ভূমিকম্পৰ বাবে ঘৰবোৰ কঁপিছে, কিন্তু পাছত উপলব্ধি কৰিলো যে সেয়া অইলৰ বিধ্বংসী জুইৰ বাবেহে হৈছে। এই বিধ্বংসী কাণ্ডৰ পাছত মানুহবোৰ আতংকিত হৈছে আৰু উদ্বিগ্নতাৰে বাস কৰিছে,’’-বাঘজান নতুন গাঁৱৰ এগৰাকী বাসিন্দাই কয়।
ভাৰতী তেল নিগমে এক আগতীয়া সাৱধানতাৰ পদক্ষেপ হিচাপে গাঁওসমূহৰ পৰা লোকসকলক খালী কৰাইছে। গাঁওবাসীক সাহায্য শিৱিৰলৈ স্থানান্তৰ কৰা হৈছে বুলি এগৰাকী বিষয়াই জানিবলৈ দিয়ে।
ভাৰতীয় বায়ুসেনা আৰু অ’এনজিচিৰ অগ্নিনিৰ্বাপক বাহিনীয়ে জুই নুমুৱাবলৈ প্ৰচেষ্টা অব্যাহত ৰাখিছে।
বাঘজান অঞ্চলত যিকোনো অবাঞ্চিত ঘটনা প্ৰতিৰোধ কৰিবলৈ সেনা নিয়োগ কৰা হৈছে। বিধ্বস্ত হৈ পৰা স্থানডোখৰৰ ওচৰৰ সমগ্ৰ অঞ্চলটো সেনাই আৱৰি ৰাখিছে।
‘বাঘজান ৫ নম্বৰ গেছ খাদৰ পৰা নিৰৱিচ্ছিন্নভাৱে নিৰ্গত গেছ তথা তেলৰ বাবে বাঘজানৰ সমগ্ৰ জৈৱ বৈচিত্ৰ ক্ষতিগ্ৰস্ত হৈছে। এই বিধ্বংসী কাণ্ডৰ ফলত অন্যতম বৃহৎ জলাশয় মাগুৰি-মটাপুং বিল ক্ষতিগ্ৰস্ত হৈছে।
‘’ বিধ্বংসী কাণ্ডটো সংঘটিত হোৱাৰ পাছৰে পৰা মাগুৰি-মটাপুং বিলত নিয়মিত দেখা পোৱা বনৰীয়া ম’হ দেখা যোৱা নাই। ডিব্ৰু-ছৈখোৱা ৰাষ্ট্ৰীয় উদ্যানৰ জীৱকূললৈয়ো ভাবুকি আহিছে,’’-এগৰাকী স্থানীয় বন্যপ্ৰাণী কৰ্মী বিজয় গগৈয়ে কয়।