সত্ৰনগৰী বৰপেটাৰ আকাশ বতাহ সম্প্ৰতি মুখৰিত হৈ পৰিছে হোলী গীতৰ ধ্বনিত। বৰপেটাবাসীৰ প্ৰাণৰ উৎসৱ দৌল মহোৎসৱ ১৬ মাৰ্চৰ পৰা চাৰিদিনীয়াকৈ বৰপেটা সত্ৰত পালন কৰা হৈছে ৷
বৰপেটাৰ আবাল-বৃদ্ধ, ডেকা-গাভৰু সকলোৱে একাত্ম ভাৱনাৰে পালন কৰিছে দৌলোৎসৱ ৷
শ্ৰীশ্ৰী মাধৱদেৱে প্ৰতিষ্ঠিত বৰপেটা সত্ৰত প্ৰথমজনা সত্ৰাধিকাৰ মথুৰাদাস বুঢ়াআতাই এই সত্ৰত দৌলোৎসৱৰ পাতনি মেলে। তাহানিৰ পৰা আজিৰ সময়ছোৱালৈ সেই একে সত্ৰীয়া ৰীতি-নীতিৰে এই উৎসৱ পালিত হৈ আহিছে।
ঐতিহ্যমণ্ডিত বৰপেটা সত্ৰত কালি আৰু আজি ভৰদৌল হিচাপে পালন কৰা হয়। আজি নিশা গুণমালা, লীলামালা, গুৰুভটিমা, সেৱা কীৰ্তন আদি নিবেদনৰ অন্তত বৰধেমালি বজাই অংকীয়া নাট পৰিবেশনেৰে ভৰদৌলৰ কাৰ্যক্ৰমণিকাৰ অন্ত পেলাব ৷
নিশাৰ ভাগত দৌল গোবিন্দ আৰু কলীয়া ঠাকুৰক দৌল গৃহৰ পৰা নমাই কীৰ্তন ঘৰলৈ নিয়া হব ৷ বৰপেটাত কাইলৈ পালন কৰা হ’ব ফাকুৱা অৰ্থাৎ সুৱেৰী ৷ কাইলৈ ৰঙে ৰঙে একাকাৰ হব বৰপেটা ৷
