নিৰ্বাচনৰ দিন যিমানেই ওচৰ চাপি আহিছে সিমানেই প্ৰধানমন্ত্ৰী নৰেন্দ্ৰ মোদীকে ধৰি বিভিন্ন দলৰ শীৰ্ষ নেতাৰ অসম আগমণৰ ধুম উঠিছে।
প্ৰধানমন্ত্ৰী মোদীয়ে বিগত কিছুদিনত দুবাৰকৈ অসম ভ্ৰমণ কৰি যোৱাৰ পিছত পুনৰ অহা ২২ ফেব্ৰুৱাৰী সোমবাৰে অসমলৈ আহিব।
জানিব পৰা মতে উক্ত দিনা প্ৰধানমন্ত্ৰী মোদীয়ে ধেমাজী আৰু চিলাপথাৰৰ দুখনকৈ বিশাল ৰাজহুৱা সভাত অংশগ্ৰহণ কৰিব।
সেইদিনাই তেওঁ ভিডিঅ’ কনফাৰেন্সৰ জৰিয়তে বিজেপিৰ আন এখন সভাও সম্বোধন কৰিব বুলি জানিব পৰা গৈছে।
উল্লেখ্য যোৱা ২৩ জানুৱাৰী আৰু ৭ ফেব্ৰুৱাৰীত মোদীয়ে দুবাৰকৈ অসম ভ্ৰমণ কৰি
আগন্তুক অসম বিধানসভা নিৰ্বাচনৰ প্ৰতি লক্ষ্য ৰাখি প্ৰধান মন্ত্ৰী মোদীৰ লগতে বিজেপি দলৰ আন আন শীৰ্ষ কেন্দ্ৰীয় নেতৃত্বৰ সঘনাই কৰিবলৈ ধৰা অসম ভ্ৰমণে যথেষ্ট তাৎপৰ্য বহন কৰিছে।
যোৱা ২৩ জানুৱাৰিত প্ৰধান মন্ত্ৰী মোদীয়ে শিৱসাগৰ জিলাৰ ঐতিহাসিক জেৰেঙা পথাৰত আয়োজিত এক বিশাল কাৰ্যসূচীত অংশগ্ৰহণ কৰি ৰাজ্যৰ ১.০৬ লাখ খিলঞ্জীয়া লোকক ভূমি পট্টা প্ৰদান কৰে।
পৰৱৰ্তী ভ্ৰমণত প্ৰধান মন্ত্ৰী মোদীয়ে বিশ্বনাথ জিলাৰ বিশ্বনাথ চাৰিআলিত এখন চিকিৎসা মহাবিদ্যালয়ৰ আধাৰশিলা স্থাপন কৰে ।
উল্লেখ্য যে আগন্তুক বিধানসভা নিৰ্বাচনত বিজেপি মিত্ৰজোঁটে ১২৬খন আসনৰ ভিতৰৰে ১০০ৰো অধিক আসনত জয়ী হোৱাৰ লক্ষ্য বান্ধি লৈছে।
এই লক্ষ্যত উপনীত হ’বলৈ প্ৰধান মন্ত্ৰী নৰেন্দ্ৰ মোদী, অমিত শ্বাহ, জেপি নাড্ডাকে ধৰি আন আন শীৰ্ষ নেতাসকলে অসমলৈ আহি ভোটাৰ আইজক আকৰ্ষিত কৰাৰ চেষ্টাত ব্ৰতী হৈছে।
