নিৰ্বাচনী প্ৰচাৰ অভিযান চলাবৰ বাবে ৩০ মাৰ্চত অসমলৈ আহিব প্ৰধান মন্ত্ৰী নৰেন্দ্ৰ মোদী। নৰ্থ-ইষ্ট নাওৰ সাংবাদিকৰ আগত আজি এই কথা প্ৰকাশ কৰে ৰাজ্যিক বিজেপিৰ এগৰাকী কৰ্ম-কৰ্তাই।
অসমত প্ৰথম পৰ্য্যায়ৰ নিৰ্বাচনৰ প্ৰচাৰৰ বাবে আহিবলগীয়া মোদীয়ে তেজপুৰ সমষ্টিৰ গহপুৰত দিনৰ ১২ বজাত আৰু ডিব্ৰুগড় সমষ্টিৰ মৰাণত বিয়লি ৩.২০ বজাত দুখন বিশাল নিৰ্বাচনী সভাত অংশগ্ৰহণ কৰি দলীয় প্ৰাৰ্থীৰ হৈ নিৰ্বাচনী প্ৰচাৰ চলাই দিল্লীলৈ উভতিব।
উল্লেখযোগ্য যে, ১১ এপ্ৰিলত তেজপুৰ আৰু ডিব্ৰুগড় লোকসভা সমষ্টিত ভোটগ্ৰহণ অনুষ্ঠিত হ’ব। ডিব্ৰুগড়ত বিজেপিৰ প্ৰাৰ্থী হিচাপে প্ৰতিদ্বন্দ্বিতা কৰিব বৰ্তমানৰ সাংসদ ৰামেশ্বৰ তেলীয়ে। তেলীৰ বিৰুদ্ধে কংগ্ৰেছৰ প্ৰাৰ্থী হিচাপে আছে প্ৰাক্তন ড’নাৰ মন্ত্ৰী পৱন সিং ঘাটোৱাৰ।
আনহাতে, তেজপুৰ সমষ্টিত কংগ্ৰেছে প্ৰাক্তন প্ৰশাসনিক বিষয়া এম জি ভি কে ভানুক দলীয় প্ৰাৰ্থী হিচাপে ঘোষণা কৰিছে যদিও এতিয়ালৈ বিজেপিয়ে সমষ্টিটোত প্ৰাৰ্থীৰ নাম ঘোষণা কৰা নাই।
ৰাজ্যিক বিজেপিয়ে ইতিমধ্যে প্ৰাধান মন্ত্ৰীৰ অসম ভ্ৰমণক লৈ তৎপৰ হৈ পৰিছে। নিৰ্বাচনী সভা সফল ভাবে অনুষ্ঠিত কৰাৰ ক্ষেত্ৰত কোনোধৰণৰ ক্ৰতি ৰাখিব বিচৰা নাই ৰাজ্যিক বিজেপি নেতৃত্বই।
