দৰঙৰ এগৰাকী আৰক্ষী কোভিড১৯ত আক্ৰান্ত হৈ মৃত্যু হৈছে।
উপেন ডেকা নামৰ ৫৫ বছৰীয়া অসম আৰক্ষীৰ কনিষ্টবল গৰাকীয়ে গুৱাহাটী চিকিৎসা মহাবিদ্যালয় আৰু চিকিৎসালয়ত কোভিড১৯ত আক্ৰান্ত হৈ মৃত্যুবৰণ কৰিছে।
৭৪ সংখ্যক স্বাধীনতা দিৱসৰ পূৰ্বে পেৰেড অনুশীলনৰ সময়তে আৰক্ষী কনিষ্টবল গৰাকীৰ শৰীৰত কোভিড১৯ৰ উপস্থিতি ধৰা পৰিছিল।
মৃত ডেকা হৈছে জিলাখনৰ প্ৰথমগৰাকী কোভিড১৯ত আক্ৰান্ত হৈ মৃত্যু হোৱা আৰক্ষীৰ লোক।
সোমবাৰে সন্ধিয়া অসম আৰক্ষীৰ শীৰ্ষ বিষয়া মধ্য পশ্চিম অসমৰ ডিআইজি ব্ৰজেনজিৎ সিনহা আৰু জিলাখনৰ আৰক্ষী অধীক্ষক অমৃত ভূঞাই শইকীয়াপাৰাস্থিত দৰং আৰক্ষী ৰিজাৰ্ভত নিহত উপেন ডেকাৰ প্ৰতি শেষ শ্ৰদ্ধা নিবেদন কৰে।
আনহাতে সোমবাৰৰ দিনটোত মুখ্যমন্ত্ৰী কাৰ্যালয়ৰ এগৰাকী চালক দৰঙৰ মিণ্টু শৰ্মাসহ জিলাখনৰ অন্য ৩০ জন লোক কোভিড১৯ত আক্ৰান্ত হৈছে।
জিলা স্বাস্থ্য বিভাগে জনোৱা অনুসৰি জিলাখনত বৰ্তমানলৈকে ২১৪৮ গৰাকী লোক ক’ৰ’নাত আক্ৰান্ত হৈছে।
ইয়াৰে ৬৮৩ গৰাকী আক্ৰান্ত এতিয়াও চিকিৎসাধীন হৈ আছে আৰু ১৪৫৭ গৰাকী আক্ৰান্তক স্বাস্থ্য বিভাগে ইতিমধ্যে কোভিডমুক্ত বুলি ঘোষণা কৰিছে।
