দীৰ্ঘদিন ধৰি দুৰাৰোগ্য ৰোগত আক্ৰান্ত দৰিদ্ৰ যুৱক : চিকিৎসাৰ বাবে ধনৰ অভাৱ

বোকাখাত মহকুমাৰ কুৰুৱাবাহী চিনাকান গাঁৱত এজন ৰোগাক্ৰান্ত যুৱকৰ চিকিৎসাৰ বাবে হাহাকাৰ কৰিব লগা হৈছে এটা দৰিদ্ৰ পৰিয়ালে৷

বৃহত্তৰ কুৰুৱাবাহী অঞ্চলৰ চিনাকান গাঁৱৰ এই যুৱকজনৰ নাম ৰোষেশ্বৰ দাস। ৩৭ বছৰীয়া এই যুৱকজন ২০১৫ চনৰ পৰাই স্নায়ুজনিত ৰোগত আক্ৰান্ত হৈ শয্যাশায়ী হৈ আছে৷

বিগত ৫ বছৰেই এক মৰ্মান্তিক পৰিৱেশ আৰু যন্ত্ৰণাত পাৰ হৈছে যুৱকজনৰ সময়। এসময়ত দৰ্জীৰ কাম কৰি সুন্দৰভাৱে পৰিয়ালৰ ভৰণ পোষণ কৰি অহা ৰোষেশ্বৰ দাসৰ শৰীৰত ৫ বছৰৰ পূৰ্বে এক জটিল স্নায়বিক ৰোগে দেখা দিয়ে৷

স্থানীয় চিকিৎসকৰ পৰামর্শ অনুসৰিয়েই চিকিৎসাৰ বাবে যুবকজনক ভৰ্তি কৰা হৈছিল গুৱাহাটী চিকিৎসা মহাবিদ্যালয়ত৷ সেইমতে চিকিৎসাও চলিছিল৷ গুৱাহাটী চিকিৎসা মহাবিদ্যালয়ত ৰোষেশ্বৰ দাসৰ এট জটিল অস্ত্ৰোপচাৰো কৰা হৈছিল৷

অস্ত্ৰোপচাৰৰ পাছৰে পৰাই শয্যাশায়ী হৈ পৰিছিল যুৱকজন৷ সহায় নহ’লে বিচনাৰ পৰা উঠিবলৈ অপাৰগ হৈ পৰিছিল৷

যোৱা পাঁচটা বছৰে সাধাৰণ এখন বিচনাত শয্যাশায়ী হৈ থকা যুৱকজনৰ শৰীৰ এতিয়া কেইবা ডালে ৰচিৰে বান্ধি থোৱা হয়৷ বন্ধি থোৱা এই ৰচীবোৰৰ সহায় লৈ ৰোষেশ্বৰে সামান্যভাৱে সঞ্চালন কৰিব পাৰে নিজৰ শৰীৰটোক।

এনে হৃদয়বিদাৰক দৃশ্যৰ চকুৰ আগত লৈয়ে সম্প্ৰতি জীৱন নিৰ্বাহ কৰিবলগীয়া হৈছে অসহায় আৰু দৰিদ্ৰ পৰিয়ালটোয়ে।

চিকিৎসাৰ নামত ইতিমধ্যে মাটি-ভেঁটি সকলো বিক্ৰী কৰিছে ৰোষেশ্বৰৰ পৰিয়ালে৷

ৰাজ্যখনৰ বিভিন্ন চিকিৎসালয়ত সাধ্য অনুসাৰে দৰিদ্ৰ পৰিয়ালটোয়ে যুৱকজনক চিকিৎসা কৰিছে যদিও বৰ্তমানলৈকে স্বাস্থ্যৰ কোনো পৰিবৰ্তন হোৱা নাই।

উন্নতিৰ ঢাক-ঢোল কোবোৱা অসমৰ স্বাস্থ্য বিভাগৰ তৰফৰ পৰাও পোৱা নাই কোনোধৰণৰ সহায়-সাৰথি৷ উপায়হীন পৰিয়ালটোৱে এতিয়া ৰোষেশ্বৰ দাসৰ চিকিৎসাৰ বাবে সচেতন ৰাইজৰ পৰা সহায় বিচাৰিছে৷