ছবি পৰিচালক, কৰিঅ’গ্ৰাফাৰ আৰু অভিনেতা ৪৭ বৰ্ষীয় প্ৰভু দেৱাই মুম্বাইৰ এগৰাকী চিকিৎসকৰ সৈতে বিবাহপাশত আৱদ্ধ হৈছে। এই কথা প্ৰকাশ কৰিছে প্ৰভু দেৱাৰ ভাতৃ ৰাজু চুন্দাৰমনে।
ই-টাইমছ নামৰ এটা সংবাদ প্ৰতিষ্ঠানক দিয়া এক সাক্ষাৎকাৰত ৰাজু চুন্দাৰমনে কয় যে তেওঁৰ ভাতৃ প্ৰভু দেৱাই ইতিমধ্যে ডাঃ হিমানী নামৰ মুম্বাইৰ এগৰাকী চিকিৎসক বিয়া কৰোৱাইছে।
চুন্দাৰমনৰ উদ্ধৃতিৰে সংবাদ প্ৰতিষ্ঠানটোৱে কয় যে ল’কডাউনৰ সময়ত অৰ্থাৎ যোৱা মে’ মাহতে প্ৰভু দেৱা আৰু ডাঃ হিমানীয়ে বিবাহপাশত আৱদ্ধ হৈছে।
দুয়ো বিবাহপাশত আৱদ্ধ হোৱাৰ পূৰ্বে দুমাহ লিভ-ইন ৰিলেশ্যনশ্বীপতো আছিল বুলি সদৰী কৰিছে প্ৰভু দেৱাৰ ভাতৃ চুন্দাৰমনে।
প্ৰভু দেৱাই ডাঃ হিমানী তত্বাৱধনাত চিকিৎসা গ্ৰহণ কৰি আহিছিল আৰু সেইদৰেই তেওঁলোক দুয়ো প্ৰেমাপাশত বন্দী হৈছিল বুলি প্ৰকাশ কৰিছে তেওঁ।
১৯৯৫ চনত ৰামলাথক বিবাহ কৰোৱা প্ৰভু দেৱা দুই সন্তানৰ পিতৃ। ২০১১ চনত ৰামলাথৰ সৈতে বিবাহ বিচ্ছেদ হোৱাৰ পিছত প্ৰভু দেৱাই দক্ষিণৰ জনপ্ৰিয় অভিনেত্ৰী নয়নতৰাৰ সৈতে প্ৰেমৰ সম্পৰ্কত বান্ধ খাইছিল।
আনকি তেওঁলোকে বিবাহপাশত আৱদ্ধ হোৱা বুলিও সংবাদ মাধ্যমত বাতৰি প্ৰকাশ পাইছিল। পিছলৈ নয়নতৰাই পৰিচালক ভিগনেশ শিৱমৰ সৈতে সম্পৰ্কত থকাৰ কথা ৰাজহুৱা কৰে।
উল্লেখ্য যে দক্ষিণৰ চুপাৰষ্টাৰ প্ৰভু দেৱাই বলিউদৰ কেবাখনো জনপ্ৰিয় ছবি পৰিচালনা কৰিলেও তেওঁ কৰিঅ’গ্ৰাফাৰ হিচাপে দেশজুৰি খ্যাতি লাভ কৰে। আনকি তেওঁ কেবাখনো ছবিতো অভিনয়ো কৰিছিল।
মুকাৱালা, উৰ্ৱশী উৰ্ৱশী আৰু কেই চেৰা চেৰা আদি গানৰ কৰিঅ’গ্ৰাফ কৰি দেশজুৰি বিখ্যাত হোৱাৰ লগতে প্ৰভু দেৱাই বলিউদৰ জনপ্ৰিয় ছবি ৱানটেড, ৰাওডি ৰাথোৰ, আৰ ৰাজকুমাৰ, একশ্যন জেকশ্যন আৰু দিবাং-৩ আদি ছবি পৰিচালনা কৰিছে।
