পদুলি মুখত অসমীয়াৰ হেঁপাহৰ ৰঙালী বিহুটি। ৰাজ্যৰ বিভিন্ন প্ৰান্তত ৰঙালী বিহুক আদৰিবলৈ ব্যাপক প্ৰস্তুতি চলিছে। ঠিক সেইদৰে ঢোল-পেঁপা-বাঁহীৰ শব্দই ৰজনজনাই আছে শিৱসাগৰৰ নিমাইজান।
শিৱসাগৰৰ নিমাইজানৰ লোকবাদ্য শিল্পী দ্বিজেন গগৈৰ ঘৰত এতিয়া ৰঙালীৰ আনন্দৰ পৰিৱেশ। ন ন বাদ্য যন্ত্ৰ প্ৰস্তুত কৰি এইবাৰ ৰঙালী বিহুটিক আদৰিবলৈ সাজু হৈছে লোকবাদ্য শিল্পী দ্বিজেন গগৈ আৰু তেওঁৰ বিহু দল।
এই গৰাকী শিল্পীয়ে বিগত কেইবা দশক ধৰি বিহুৰ লগত জড়িত বাদ্য যন্ত্ৰৰ উপৰি অসমৰ বিভিন্ন জনগোষ্ঠীয় লোকবাদ্য প্ৰস্তুত কৰাৰ লগতে লগতে সুন্দৰকে বজাই চমক সৃষ্টি কৰি আহিছে।
এইবাৰ দ্বিজেন গগৈয়ে ১৬ ফুট দৈৰ্ঘ্যৰ বাঁহী, ১৪ ফুট দৈৰ্ঘ্যৰ পেঁপা আৰু ৭ ফুট দৈৰ্ঘ্যৰ টকা নিৰ্মাণ কৰি চমক সৃষ্টি কৰিছে। তদুপৰি তেওঁ নিৰ্মাণ কৰিছে ঢোল, মহৰ শিঙৰ পেঁপা, গগনা, হুটলি আদি।
এতিয়া ৰাজ্যৰ বিভিন্ন প্ৰান্তৰ পৰা গ্ৰাহক আহি ভিৰ কৰিছেহি দ্বিজেন গগৈৰ সুৰ সমলয় কেন্দ্ৰত। দ্বিজেন গগৈয়ে প্ৰস্তুত কৰা ঢোল, পেঁপা, গগনা আদি কিনিবলৈ ঢপলিয়াই আহিছে বিহুৱা-বিহুৱতী সকল।
উল্লেখ্য যে এইগৰাকী শিল্পীয়ে ১০০ ৰো অধিক লোকবাদ্য নিৰ্মাণ কৰি নিজ গৃহত সংৰক্ষণ কৰি ৰখাৰ লগতে অসম তথা দেশৰ বিভিন্ন প্ৰান্তলৈ যোগান ধৰি আহিছে।
