কৰ’না ভাইৰাছৰ বিৰুদ্ধে যুঁজত নিজৰ সক্ৰিয় সঁহাৰিৰ কথা সদৰী কৰিছে ৰাষ্ট্ৰপতি ৰাম নাথ কোবিন্দে।
ৰাষ্ট্ৰপতিগৰাকীয়ে এবছৰৰ বাবে তেওঁৰ দৰমহা ৩০ শতাংশ কমকৈ লোৱাৰ সিদ্ধান্ত গ্ৰহণ কৰিছে।
তদুপৰি, তেওঁ নিজৰ ভ্ৰমণ তথা আনুষ্ঠানিক খৰচো হ্ৰাস কৰাৰ সিদ্ধান্ত লৈছে।
ৰাষ্ট্ৰপতি ভৱনৰ পৰা জাৰি কৰা এক বিবৃতিত কোৱা হৈছে যে ৰাষ্ট্ৰপতি ৰামনাথ কোবিন্দে নিজেই এই নিৰ্দেশ আগবঢ়াইছে।
উল্লেখ্য যে যোৱা মাৰ্চ মাহত ৰাষ্ট্ৰপতিগৰাকীয়ে পি এম কেয়াৰ্ছলৈ এমাহৰ দৰমহা বৰঙণি হিচাপে আগবঢ়াইছিল।
বিবৃতিটোত কোৱা হৈছে,’’ ভাৰতক আত্মনিৰ্ভৰশীল কৰি তুলিবলৈ আৰু কৰ’না মহামাৰীৰ প্ৰত্যাহ্বানৰ বিৰুদ্ধে যুঁজত ৰাষ্ট্ৰপতিৰ এয়া সামান্য হ’লেও গুৰুত্বপূৰ্ণ অৱদান। এই ধৰণে আমাৰ উন্নয়নৰ যাত্ৰাও সমান্তৰালভাৱে চলি থাকিব।‘’
ইন্ধনকে ধৰি আন খৰচ হ্ৰাস কৰাৰ লগতে ৰাষ্ট্ৰপতিগৰাকীয়ে আন্তৰ্জাতিক ভ্ৰমণ হ্ৰাসৰ ওপৰতো গুৰুত্ব দিছে।
তেওঁ প্ৰযুক্তিৰ জৰিয়তে মানুহৰ সৈতে সম্পৰ্ক স্থাপনৰ কথাও উল্লেখ কৰে। অৰ্থাৎ অনলাইনৰ বৈঠকৰ ওপৰতে তেওঁ গুৰুত্ব দিব বিচাৰিছে।
আগন্তুক স্বাধীনতা দিৱস, গণতন্ত্ৰ দিৱসৰ আনুষ্ঠানিক আয়োজনত ৰাষ্ট্ৰপতি ভৱনে অতিথিৰ তালিকা হ্ৰাস কৰিব বিচাৰিছে।
