শিৱসাগৰৰ দুই আৰক্ষী বিষয়ালৈ ৰাষ্ট্ৰপতিৰ উৎকৃষ্ট সেৱা পদক: উৎফুল্ল শিৱসাগৰবাসী
অসম আৰক্ষীত নিজৰ কৰ্মদক্ষতাৰ পৰিচয় দাঙি ধৰি দেশলৈ আগবঢ়োৱা উৎকৃষ্ট সেৱাৰ বাবে শিৱসাগৰৰ দুই আৰক্ষী বিষয়ালৈ ৭২ সংখ্যক স্বাধীনতা দিৱসত আগবঢ়োৱা হৈছে দেশৰ ৰাষ্ট্ৰপতিৰ উৎকৃষ্ট সেৱা পদক।
শিৱসাগৰৰ এই দুই সু-সন্তান ক্ৰমে পাৰ্থ সাৰথি মহন্ত আৰু পদ্মজ্যোতি গগৈৰ সাফল্যত উৎফুলিত হৈ পৰিছে সমগ্ৰ শিৱসাগৰবাসী।
উল্লেখ্য যে কামৰূপ জিলাৰ আৰক্ষী অধীক্ষক হিচাপে কাৰ্য্যনিৰ্বাহ কৰি থকা পাৰ্থ সাৰথি মহন্তই পাৰদৰ্শিতাৰে আগবঢ়োৱা প্ৰশাসনিক সেৱাৰ বাবে দেশৰ ৰাষ্ট্ৰপতিৰ উৎকৃষ্ট সেৱা পদক লাভ কৰিবলৈ সক্ষম হৈছে।
শিৱসাগৰৰ জয়সাগৰত জন্মগ্ৰহণ কৰা পাৰ্থ সাৰথি মহন্ত বিশিষ্ট শিক্ষাবিদ, লেখক, সাংবাদিক প্ৰয়াত শৰৎ মহন্তৰ জেষ্ঠ পুত্ৰ।
আনহাতে ৰাষ্ট্ৰপতিৰ পদক পাবলৈ সক্ষম হোৱা আন এজন শিৱসাগৰৰ সন্তান হৈছে বৰ্তমান কাৰ্বি আংলঙত কৰ্মৰত অসম আৰক্ষীৰ সুদক্ষ সহ উপ পৰিদৰ্শক পদ্মজ্যোতি গগৈ।
পদ্মজ্যোতি গগৈও প্ৰশাসনিক কামকাজত দেখুওৱা পাৰদৰ্শিতাৰ বাবে ৰাষ্ট্ৰপতিৰ উৎকৃষ্ট সেৱা পদক লাভ কৰে। গগৈৰ ঘৰ শিৱসাগৰৰ নামতিত। পদ্মজ্যোতি গগৈ অসম আৰক্ষীৰ এজন বোমা বিশেষজ্ঞ।
শিৱসাগৰৰ দুয়োজন আৰক্ষী বিষয়াৰ সাফল্যত সমগ্ৰ শিৱসাগৰবাসীয়ে অভিনন্দন জনোৱাৰ লগতে তেওঁলোকৰ ভৱিষ্যত উজ্জ্বল কামনা কৰিছে।