আজি ৭০ টাকৈ সংগঠনে দিছপুৰলৈ গৈ নাগৰিকত্ব বিধেয়ক ২০১৬ বাতিলৰ দাবীত দিছপুৰ কঁপাবলৈ লোৱা প্ৰতিবাদী কাৰ্যসূচীত অংশ গ্ৰহণ কৰিবলৈ যোৱাৰ পথতে বঙাইগাঁও জিলাৰ মাণিকপুৰত মাণিকপুৰ আৰক্ষীয়ে আমছু, কৃষক মুক্তি সংগ্ৰাম সমিতিৰ কেইবাশতাধিক প্ৰতিবাদকাৰীক আটক কৰে।
প্ৰাপ্ত তথ্য মতে আজি পুৱা ৭ বজাত প্ৰতিবাদকাৰীসকলক গুৱাহাটীলৈ গৈ থকা অৱস্থাতে ৩১ নং ৰাষ্ট্ৰীয় ঘাইপথতে বঙাইগাঁও জিলা প্ৰশাসন আৰু চি আৰ পি এফে বঙাইগাঁও জিলাৰ অতিৰিক্ত আৰক্ষী অধীক্ষক অমৰ চৌধুৰী, জিলা ন্যায়াধীশ আৰু মাণিকপুৰ আৰক্ষীৰ নেতৃত্বত অৰ্ধশতাধিক আমছুৰ নেতা কৰ্মীক আটক কৰে।
আটকাধীন লোক সকলৰ মাজত আমছুৰ সভাপতি ৰেজাউল কৰিম সৰকাৰ, বঙাইগাঁও জিলা কৃষক মুক্তি সংগ্ৰাম সমিতিৰ সভাপতি মহিধৰ ৰায়কে ধৰি অৰ্ধাশতাধিক কৰ্মী।
পিছত ৯ বজাত বঙাইগাঁও জিলা, বিজনী আৰু মাণিকপুৰৰ পৰা আমছু আৰু কৃষক মুক্তি সংগ্ৰাম সমিতিৰ বঙাইগাঁও জিলা সমিতিৰ সভাপতি মহিদৰ ৰায়সহ কেইবা শতাধিক প্ৰতিবাদকাৰী সমবেত হৈ ৩১ নং ৰাষ্ট্ৰীয় ঘাইপথ অৱৰোধ কৰি ‘গ’ বেক, মুৰ্দাবাদ, অসম চৰকাৰ হায় হায়, নাগৰিকত্ব সংশোধনী বিধেয়ক ২০১৬ বাতিল কৰক’ আদি প্ৰতিবাদী শ্ল’গানেৰে ৰাজপথ উত্তাল কৰি তোলে।
আনহাতে আমছুৰ সভাপতি ৰেজাউল কৰিম সৰকাৰ, উপ-সভাপতি মহিবুল ইছলাম, কৃষক মুক্তি সংগ্ৰাম সমিতিৰ বঙাইগাঁও জিলা সমিতিৰ সভাপতি মহিদৰ ৰায়, বৰপেটা জিলা আমছুৰ সভাপতি নজৰুল ইছলাম আদিকে ধৰি শতাধিক আটকাধীন প্ৰতিবাদকাৰীক বঙাইগাঁৱলৈ প্ৰেৰণ কৰা হয়।
ইফালে আমছুৰ সভাপতি ৰেজাউল কৰিম সৰকাৰে ৭০ টা সংগঠনে কৰা সংকল্প যাত্ৰা চৰকাৰে মসিমূৰ কৰিবৈল চেষ্টা কৰিলেও চৰকাৰ সফল হ’ব নোৱাৰিব বুলি মন্তব্য কৰে। লগতে ২০১৬ নাগৰিকত্ব সংশোধনী বিধেয়ক বাতিল নকৰিলে চৰকাৰক শান্তিত থাকবিলৈ দিয়া নহ’ব বুলিও কয়।
