আইপিএল-২০২২ৰ আৰম্ভণিতে এইবাৰ ক্ৰিকেটপ্ৰেমীসকলে টী-২০ মেচৰ উত্তেজনাৰ আনন্দ উপভোগ কৰিলে। মুম্বাইৰ ডি ৱাই পাটিল ষ্টেডিয়ামত দেওবাৰে ২০৫ৰাণৰ বিশাল ৰাণ কৰিও বিজয়ৰ পৰা বঞ্চিত হ’ল ৰয়েল চেলেঞ্জাৰ্ছ বেংগালোৰ। মায়ংক আগৰৱালাৰ নেতৃত্বত পঞ্জাৱ কিংছে নাটকীয় জয় সাৱ্যস্ত কৰে।
বিশাল ৰাণৰ লক্ষ্য অনুসৰণ কৰি পঞ্জাৱে সুন্দৰ আৰম্ভণি ঘটায়। সকলোৰে দৃষ্টিত থকা শিখৰ ধাৱানে প্ৰথমে মায়ংক আগৰৱালৰ (৩২) আৰু ভানুকা ৰাজাপক্ষেৰ (৪৩) সৈতে যুটী বান্ধি দলক আগবঢ়াই নিয়ে। কিন্তু ব্যক্তিগত ৪৩ৰাণত হৰ্ষল পেটেলৰ বলত অনুজ ৰাৱাটৰ হাতত কেচ দি পেভলিয়নলৈ ওভতে।
মিডল অৰ্ডাৰত কিছু চাপৰ সন্মুখীন হয় পঞ্জাৱ কিংছ। আকাশ দীপ, মহম্মদ ছিৰাজৰ বলিঙত সামান্য শলঠেকত পৰা যেন দেখা যায়। কিন্তু ফিল্ডাৰৰ কেচ মিচ আৰু বলাৰে দিয়া অতিৰিক্ত ৰাণৰ সুযোগ গ্ৰহণ কৰি শ্বাহৰুখ খান আৰু ওডেন স্মিথে ক্ৰমে অপৰাজিত ২৫ আৰু ২৪ৰাণ কৰে। অন্তিম তিনি অভাৰত বিস্ফোৰক ছয় আৰু চাৰি মাৰি দলৰ বিজয় সাৱ্যস্ত কৰে।
লগতে পঢ়ক: কেমেৰাৰ সন্মুখতে বিহাৰৰ মুখ্যমন্ত্ৰী নীতিশ কুমাৰক আক্ৰমণ, যুৱকক গ্ৰেপ্তাৰ
ইপিনে, আৰচিবিৰ অধিনায়কত্ব এৰা কোহলিয়ে মাত্ৰ ২৯টা বলতে অপৰাজিত ৪১ৰাণ কৰে। সেইদৰে নতুন অধিনায়ক ফেফ ডুপ্লেচিয়ে ৮৮ৰাণৰ এক দমনীয় ইনিংছ খেলে। তেওঁ মুঠতে ৭টা ছয় আৰু ৩টা চাৰি কোবায়। দীনেশ কাৰ্তিকেও অপৰাজিত ৩২ ৰাণৰ এক বিস্ফোৰক ইনিংছ খেলে।তথাপি শেষ ৰক্ষা নহ’ল আৰচিবিৰ।
ৰয়েল চেলেঞ্জাৰ্ছ বেংগালোৰৰ দৰে শক্তিশালী দলৰ বিৰুদ্ধে ২০০ৰাণতকৈও অধিক ৰাণ অতিক্ৰমি বিজয় সাৱ্যস্ত কৰি পঞ্জাৱ কিংছে এইবাৰ তেওঁলোকৰ শক্তিৰ উমান দিলে।
সংক্ষিপ্ত স্ক’ৰ:
ৰয়েল চেলেঞ্জাৰ্ছ বেংগালোৰ: ২০৫/২ (ডু প্লেসি-৮৮, কোহলি-৪১*)
পঞ্জাব কিংছ : ২০৮/৫ (ধাৱান-৪৩, ভানুকা-৪৩)
পাঞ্জাব কিংছ ৫ উইকেটে জয়ী।
