মঙলবাৰে সন্ধিয়া পাকিস্তানৰ বেলুচিস্তানৰ ৰাজধানী কুৱেটত এক ৰাজনৈতিক সমাৱেশত ভয়াবহ আত্মঘাতী বোমা বিস্ফোৰণ সংঘটিত হয়। এই ঘটনাত এতিয়ালৈকে কমেও ১১ জন লোক নিহত আৰু ১৮ জনতকৈও অধিক লোক আহত হৈছে বুলি জানিব পৰা গৈছে। হতাহতৰ সংখ্যা আৰু বৃদ্ধি পোৱাৰ আশংকা প্ৰকাশ কৰিছে প্ৰশাসনে।
চৰকাৰী বিষয়া হামজা ছাফায়াতৰ মতে, এই সমাৱেশটো বেলুচিস্তান নেচনেল পাৰ্টিৰ (BNP) নেতা তথা প্ৰাক্তন মুখ্যমন্ত্ৰী চৰ্দাৰ আতাউল্লাহ মেংগলৰ মৃত্যু বাৰ্ষিকী উপলক্ষে অনুষ্ঠিত হৈছিল। শ্ৰদ্ধাঞ্জলি সভা সমাপ্ত হোৱাৰ পাছতে ওচৰৰ পাৰ্কিঙত আত্মঘাতী বোমাৰু এজনে নিজকে বিস্ফোৰণ ঘটায়।
এই ভয়াবহ বিস্ফোৰণত বহু লোক ঘটনাস্থলতে মৃত্যু বৰণ কৰে আৰু বহু আহতক উদ্ধাৰ কৰি কুৱেটৰ বিভিন্ন চিকিৎসালয়লৈ পঠোৱা হয়। আৰক্ষী বিষয়া অথৰ ৰছিদে জানিবলৈ দিছে যে, “এই বিস্ফোৰণটো আত্মঘাতী আক্ৰমণ বুলি প্ৰাথমিকভাৱে ধাৰণা কৰা হৈছে। ইতিমধ্যে আৰক্ষীয়ে সম্পূৰ্ণ ঘটনাটোৰ তদন্ত আৰম্ভ কৰিছে।”
এই ঘটনাই পুনৰবাৰ পাকিস্তানৰ অভ্যন্তৰীণ নিৰাপত্তা পৰিস্থিতিক লৈ প্রশ্ন উত্থাপন কৰিছে। কুৱেটাৰ বিস্ফোৰণৰ আগতেই মঙলবাৰে পুৱা উত্তৰ-পশ্চিম পাকিস্তানৰ বান্নু জিলাত থকা এটা সামৰিক ঘাঁতত আত্মঘাতী বোমাৰু অন্য এটা আক্ৰমণ সংঘটিত হৈছিল।
বান্নুত এই বিস্ফোৰণৰ ফলত ৬ জন নিৰাপত্তাৰক্ষী আৰু ৬ জন সন্ত্ৰাসবাদীক ধৰি মুঠ ১২ জন নিহত হয়। আৰক্ষী বিষয়া সাজ্জাদ খানে জানিবলৈ দিছে যে, এজন আত্মঘাতী বোমাৰুয়ে বিস্ফোৰকেৰে ভৰা গাড়ী সামৰিক ঘাঁটিটোৰ সীমাৰ ওচৰতে খুন্দা মাৰিছিল। তাৰ পিছতে বাকী থকা সন্ত্ৰাসবাদীয়ে সেই সুযোগ লৈ ঘাঁটিটোত সোমাই যায় আৰু প্ৰায় ১২ ঘণ্টা ধৰি নিৰাপত্তাৰক্ষী আৰু সন্ত্ৰাসবাদীৰ মাজত তীব্ৰ গুলীচালনা চলিছিল।
একে দিনত পাকিস্তানৰ দুটা পৃথক পৃথক স্থানত সংঘটিত এই আত্মঘাতী আক্ৰমণে দেশখনৰ স্থিৰতা আৰু নিৰাপত্তা পৰিস্থিতিক লৈ পুনৰ আতংকৰ সৃষ্টি কৰিছে।
