ৰাভা জনগোষ্ঠীৰ লোকসকলৰ আৰোধ্য শক্তি দেৱী বায়খো পূজাক লৈ উখলমাখল কৃষ্ণাইৰ নিকটৱৰ্তী পশ্চিম দায়ৰং গাঁও।
বায়খো পূজাৰ অন্যতম অংশ হ’ল বাৰ নাককায়৷ বাৰ নাককায় হ’ল পবিত্ৰতাৰ প্ৰতীক। বাৰ নাককায়ৰ শিহৰণৰকাৰী দৃশ্য উপভোগ কৰিবলৈ ৰাভা জনগোষ্ঠীৰ লগতে আন বহুতে ৰৈ থাকে এই বিশেষ দিনটোলৈ।
এক শিহৰণকাৰী দৃশ্য। জুঁইৰ লগত খেলা কৰে একাংশ যুৱকে। কোনোয়ে যদি জুঁইৰ ওপৰত নাচিছে আন কোনোয়ে আকৌ দেহত চতিয়াইছে জুঁইৰ অগ্নিশিখা ৷ গাৰ নোম শিঁয়ৰি উঠা এক ভয়ংকৰ দৃশ্য৷
খালি ভৰিৰে জুঁইৰ ওপৰতে নাচিছে একাংশ যুৱকে। এয়া কোনো তন্ত্ৰ মন্ত্ৰৰে কৰা খেল নহয়। আচলতে এয়া ৰাভা লোকসকলৰ পৰম্পৰাগত বায়খো উৎসৱৰ বাৰ নাককায়। ৰাভা লোকসকলে অতীজৰে পৰা বায়খো দেৱীক আৰাধনা কৰি আহিছে৷
এই বায়খো দেৱীক সন্তুস্ত কৰিবলৈ “বায়ব্ৰা” সকল (নৃত্য কৰা লোক সকল) কেইবাদিনো অনাহৰে থাকি বিভিন্ন নীতি-নিয়মেৰে পূজা অৰ্চনা কৰি আৰাধ্য দেবীক সন্তুস্তু কৰিবৰ বাবে এনেদৰে জুঁইৰ ওপৰত নৃত্য কৰে ৷
“বায়ব্ৰা”সকলৰ দেৱীৰ আশীৰ্বাদত এই নৃত্য কৰা যুৱকসকলৰ একো ক্ষয় ক্ষতি নহয়। জুঁইৰ ওপৰত কৰা এই নৃত্যক ৰাভা ভাষাত “বাৰ নাককায়” বুলি কোৱা হয়। এই উৎসৱ তিনিদিনীয়া কাৰ্যসূচীৰে পালন কৰিছে কৃষ্ণাইৰ পশ্চিম দায়ৰঙত।
এই বায়খো উৎসৱ পালন কৰা হয় কৃষিজীৱি লোকসকলৰ বাবে, খেতি বাতি ভাল হোৱা আৰু বেমাৰ আজাৰৰ পৰা হাত সাৰিবলৈ এই উৎসৱ পালন কৰা হয় ৷ বায়খো দেৱীক আৰআধনা কৰিলে মনোবাঞ্ছা পূৰণ হয় বুলি ৰাভা জনগোষ্ঠীৰ লোকৰ বিশ্বাস।
