ৰাষ্ট্ৰীয় স্বয়ংসেৱক সংঘৰ শতবাৰ্ষিকী উপলক্ষে চলিত মাহৰ পৰা আৰম্ভ হ’ব বিভিন্ন অনুষ্ঠান। এই হিন্দু জাতীয়তাবাদী সংগঠনটোৱে আগন্তুক এবছৰৰ বাবে সমগ্ৰ দেশতে বিভিন্ন অনুষ্ঠানৰ আয়োজন কৰিছে। অহা ২৬ আগষ্টত তিনিদিনীয়া এক সন্মিলন উদ্বোধন কৰিব সংঘৰ মুৰব্বী মোহন ভাগৱতে।
বছৰজোৰা এই অনুষ্ঠানৰ বাবে নিমন্ত্ৰিতসকলৰ এখন দীঘলীয়া তালিকা প্ৰস্তুত কৰিছে মোহন ভাগৱতে। সকলো দলৰ আগশাৰীৰ নেতাক নিমন্ত্ৰণ কৰাৰ সিদ্ধান্ত লোৱা হৈছে।
জানিব পৰা মতে সেই তালিকাত আছে আৰ এছ এছৰ প্ৰতিদ্বন্দী ৰাহুল গান্ধী । কংগ্ৰেছৰ প্ৰাক্তন সভাপতি তথা লোকসভাৰ বিৰোধী দলপতি ৰাহুলে এদশকৰো অধিক সময় ধৰি বিজেপি আৰু সংঘক আক্ৰমণ কৰি আহিছে।
আৰ এছ এছৰ সূত্ৰই কয় যে শতবাৰ্ষিকী উদযাপনক ৰাজনৈতিক, সামাজিক মতানৈক্য আৰু বিবাদৰ পৰা মুক্ত কৰি ৰাখিব বিচাৰে। ৰাহুল গান্ধীৰ ওপৰত তেওঁলোকৰ কোনো আপত্তি নাই।
মাতিলে ৰাহুল যাব নেকি? কংগ্ৰেছৰ সূত্ৰ বা ৰাহুলৰ কাৰ্যালয়ে এই সন্দৰ্ভত একো কোৱা নাই। অৱশ্যে আৰ এছ এছৰ সৈতে ৰাহুলৰ নীতিগত মতানৈক্য ব্যক্তিগত নহয়। কংগ্ৰেছ চৰকাৰে দুবাৰকৈ আৰ এছ এছক নিষিদ্ধ কৰিছিল। যদিও বহু কংগ্ৰেছ নেতাৰ আৰ এছ এছৰ ঘনিষ্ঠতা বিভিন্ন সময়ত পোহৰলৈ আহিছে।বিদেশী অতিথিৰ লগতে আৰ এছ এছে শতবাৰ্ষিকী উদযাপনৰ বাবে বিভিন্ন দেশৰ ৰাষ্ট্ৰদূতকো আমন্ত্ৰণ জনাইছে। কিন্তু পাকিস্তান, বাংলাদেশ আৰু তুৰস্কৰ তালিকাত অন্তৰ্ভুক্ত হোৱা নাই। পাকিস্তানে ভাৰতৰ বিৰুদ্ধে অবিৰত সন্ত্ৰাসবাদী কাৰ্যকলাপৰ অভিযোগ উত্থাপন কৰিছে। তুৰস্কই অপাৰেচন চিণ্ডুৰৰ সময়ত পাকিস্তানক সামৰিক সাহায্য প্ৰদান কৰাৰ অভিযোগ উত্থাপন হৈছে। আনহাতে, বাংলাদেশৰ বৰ্তমানৰ শাসকসকলৰ ভাৰতবিৰোধী মনোভাৱৰ কাৰণ হ’ব পাৰে সেই দেশক নিমন্ত্ৰণ নকৰাৰ সিদ্ধান্ত। কিন্তু আশ্চৰ্যজনকভাৱে শতবাৰ্ষিকী উদযাপনৰ সময়ত আৰ এছ এছে চীনক অস্পৃশ্যভাৱে এৰি যোৱা নাই।
