আশংকাই সঁচা হৈ পৰিল। বৰষুণে উটুৱাই নিলে ভাৰত-পাকিস্তানৰ খেলখন। নিশা ৯.৫৩ বজাত এই খেলখন পৰিত্যক্ত ঘোষণা কৰা হয়। পাকিস্তানে বেটিং কৰিব নোৱাৰিলে। গতিকে অৱশেষত মেচখন বাতিল কৰা হ’ল।পাকিস্তানে দুখন মেচত ৩ পইণ্ট লাভ কৰি ছুপাৰ ফ’ৰত প্ৰৱেশ কৰে। কাট অফ সময় আছিল নিশা ১০.২৭ বজালৈ। যদি খেল আৰম্ভ হ’লহেঁতেন তেন্তে মেচখনৰ অভাৰ হ্ৰাস পালেহেঁতেন। কিন্তু বৰষুণ বন্ধ হোৱাৰ পিছত খেলপথাৰখন শুকুৱাই খেলিব পৰা কৰি তুলিবলৈ ৪৫ মিনিট সময় দৰকাৰ আছিল।
নিশা ৯.৫০ বজালৈকে বৰষুণ বন্ধ কৰাৰ কোনো লক্ষণ নথকাৰ বাবে অৱশেষত আম্পায়াৰসকলে মেচখন পৰিত্যক্ত ঘোষণা কৰে। পাকিস্তানী ক্ৰিকেটাৰসকলে ড্ৰেছিং ৰুমত ৰোহিত আৰু বিৰাটৰ সৈতে হাত মিলাই থকা দেখা গৈছিল। পাল্লেকেলেত ৯০ শতাংশ বৰষুণৰ আগজাননী দিয়া হৈছে। তাৰ পিছতো ক্ৰিকেট প্ৰেমীসকলে গোটেই মেচখনৰ বাবে আশা কৰিছিল।
ভাৰতীয় ইনিংছৰ সময়ত দুই-তিনিবাৰ বৰষুণৰ বাবে খেল বন্ধ কৰা হৈছিল যদিও সেয়া স্বল্পকালীন আছিল। কিন্তু প্ৰথম ইনিংছৰ বিৰতিৰ লগে লগে পুনৰ বৰষুণ আৰম্ভ হয়। পাকিস্তানে ফিল্ডত নামিবই নোৱাৰিলে। এনে হাই ভল্টেজ মেচ বাতিল হোৱা দেখি ক্ৰিকেটাৰসকলো হতাশ হ’ব। ভাৰতৰ পৰৱৰ্তী খেল সোমবাৰে আছে নেপালৰ বিৰুদ্ধে।
ইপিনে, খেলৰ প্ৰথম ইনিংছত দুটা বিষাক্ত স্পেলেৰে ১০ অভাৰত ৩৫ ৰান দি ৪টা উইকেট দখল কৰে শ্বাহীন আফ্ৰিদিয়ে। তেওঁৰ আক্ৰমণৰ বলি হয় ৰোহিত শৰ্মা, বিৰাট কোহলী, হাৰ্দিক পাণ্ডিয়া আৰু ৰবীন্দ্ৰ জাডেজা। ইয়াতেই মেচখন ঘূৰি যায়। ভাৰতে ৪৮.৫ অভাৰত ২৬৬ ৰান সংগ্ৰহ কৰি ইনিংছৰ অন্ত পেলায়। অৱশ্যে ৬৬ ৰানত ৪ উইকেট হেৰুৱাই ভাৰতৰ ইনিংছ আগতেই শেষ হ’ব পাৰিলেহেঁতেন৷ কিন্তু মিডল অভাৰত স্পিনাৰসকলৰ ব্যৰ্থতা আৰু নিম্নমানৰ ফিল্ডিঙে ভাৰতক মেচখনত পুনৰ আগবঢ়াত সহায় কৰে।
দুৰ্দান্ত প্ৰদৰ্শন কৰে ঈশান কিষান আৰু হাৰ্দিক পাণ্ডিয়াই। বিশ্বকাপত ভাৰতে বিচাৰি আছিল চাৰি আৰু পাঁচ নম্বৰ বেটছমেন। এছিয়া কাপৰ প্ৰথমখন খেলৰ পিছত সেই সমস্যা যেন কিছু পৰিমাণে সমাধান হ’ল। কঠিন সময়ত পাঁচ নম্বৰলৈ নামি চকু কপালত তুলিলে ঈশান কিষানে। যি ধৰণে খেলি আছিল, যদি তেওঁ আঘাত নাপালেহেঁতেন তেন্তে শতৰাণ অসম্ভৱ নহ’লহেঁতেন। কিন্তু ৮১টা বলত ৮২ ৰান সংগ্ৰহ কৰি আউট হয়। তেওঁৰ ইনিংছত আছিল ২টা ছয়, ৯টা চাৰি।
হাৰ্দিক পাণ্ডিয়াৰ সৈতে পাৰ্টনাৰশ্বিপেৰে পঞ্চম উইকেটৰ যুটীত ঈশানে ১৩৮ ৰান যোগ দিয়ে। এছিয়া কাপত পঞ্চম উইকেটত এয়া ভাৰতৰ সৰ্বোচ্চ ৰান। এই দুয়োজনৰ বেটিঙেৰে ভাৰতে মেচলৈ উভতি আহিছিল। হাৰ্দিককো প্ৰশংসা কৰিব লাগিব। সাধাৰণতে বিগ শ্বট খেলিবলৈ পছন্দ কৰে, কিন্তু দলৰ প্ৰয়োজন হ’লে দায়িত্বশীলভাৱে বেটিং কৰে। এটা ছয় আৰু ৭ টা চাৰিৰ সহায়ত ৯০ বলত ৮৭ ৰান সংগ্ৰহ কৰে হাৰ্ডিকে।
ভাৰতে এই দুজনৰ বাবেই সন্মানজনক স্থিতিত উপনীত হয়। শ্বাহীন আফ্ৰিদিৰ পেচত ভাৰতে আৰম্ভণিতে বেটিং দুৰ্যোগৰ সন্মুখীন হৈছিল। পাক পেচাৰগৰাকীয়ে প্ৰথমতেই ৰোহিত শৰ্মা (১১), বিৰাট কোহলী (৪)ক ঘূৰাই পঠিয়ায়। শুভমন গিল (১০) আৰু শ্ৰেয়াছ আয়াৰেও (১৪) ৰান নাপালে। ঈশান আৰু হাৰ্দিকে শীৰ্ষ অৰ্ডাৰৰ বিফলতা চম্ভালিলে। এই দুজনৰ বাহিৰে কোনো বেটছমেনে ৰান নাপালে।
শেষত বুমৰাহে গুৰুত্বপূৰ্ণ ১৬ ৰান সংযোজন কৰে। ভাৰতে ৪৮.৫ অভাৰত ২৬৬ ৰান সংগ্ৰহ কৰি অল আউট হয়। শ্বাহীনে চাৰিটা উইকেট দখল কৰে। হেৰিছ ৰাউফ আৰু নাছিম শ্বাহে ৩টাকৈ উইকেট দখল কৰে।
