মেঘালয়ত স্বামী ৰাজা ৰঘুবংশীক হত্যা কৰি সোণম ক’ত লুকাই থাকিব সেই সন্দৰ্ভত কেইবাটাও পৰিকল্পনা কৰিছিল অভিযুক্ত ৰাজ সিং কুশৱাই।
প্ৰথম পৰিকল্পনা আছিল আন এগৰাকী মহিলাৰ মৃতদেহ জ্বলাই সোণম বুলি প্ৰচাৰ কৰা। কিন্তু সেই পৰিকল্পনা কাৰ্যকৰী কৰিব পৰা নগ’ল। তাৰপিছত‘প্লেন বি’ চূড়ান্ত কৰা হয় । ইন্দোৰত সোণমে ঘৰ এটা ভাড়াত লৈ থাকিব বুলি ঠিক কৰা হৈছিল।
পৰিকল্পনা অনুসৰি এটা ঘৰ ভাড়াত লোৱা হৈছিল। ১৬ হাজাৰ টকা এডভান্স ঘৰৰ মালিকক দিয়া হয়। ভাড়া কোনে লৈছিল?
জানিব পৰা মতে, ৰাজাক হত্যা কৰিবলৈ লৈ যোৱা হৈছিল ২২ বছৰীয়া বিশাল সিং চৌহানক। বিশালে প্ৰথমে ৰাজাক আক্ৰমণ কৰিছিল। এই অভিযুক্তই সোণমৰ বাবে ইন্দোৰত এটা ঘৰ ভাড়াত লৈছিল। তদন্তৰ সময়ত ইন্দোৰ আৰক্ষীয়ে এনে তথ্য লাভ কৰে।
আৰক্ষীয়ে জনোৱা মতে, ২৩ মে’ত সোণমে ৰাজাক হত্যা কৰি আত্মগোপন কৰিছিল। কিছুদিন ৰাজৰ ঘৰত আছিল। তাৰ ঠিক সাতদিন পিছত ৩০ মে’ত ইন্দোৰত এটা ঘৰ ভাড়াত লোৱা হয়। ভাড়াত লোৱা ঘৰটো বিশালে আত্মগোপন কৰা ঠাইৰ পৰা পাঁচ কিলোমিটাৰ দূৰত আছিল।
ঘৰটো ভাড়াত লোৱাৰ সময়ত বিশালে পুলিচ ভেৰিফিকেশ্যনো কৰে। তেওঁ নিজকে ইণ্টেৰিয়ৰ ডিজাইনাৰ হিচাপে পৰিচয় দিছিল। তেওঁ কৈছিল যে ইন্দোৰত তেওঁৰ কিছু কাম আছে। সেইবাবেই তেওঁ ঘৰটো ভাড়াত লৈছে।
সেই ঘৰতে সোণম লুকাই আছিল। ‘প্ৰেমিক’ ৰাজে সোণমৰ বাবে ৫ হাজাৰ টকাৰ দৈনন্দিন প্ৰয়োজনীয় সামগ্ৰী আৰু ৰেচন ক্ৰয় কৰিছিল। তাৰ মাত্ৰ কেইদিনমান পিছতে ২ জুনত ৰাজাৰ মৃতদেহ উদ্ধাৰ হয়। ভাড়া ঘৰত বহি টিভিত সেই খবৰটো চাইছিল সোণমে।
শুকুৰবাৰে উজ্জয়িনীত ৰাজাৰ পৰিয়ালে তেওঁৰ ‘পিণ্ডদান’ কৰে। তাত উপস্থিত আছিল সোণমৰ ভায়েক গোবিন্দ। ভনীয়েকৰ এই কাণ্ডত তেওঁ বৰ লজ্জিত। তেওঁ কয়, ‘ৰাজৰ সৈতে সোণমৰ প্ৰেমৰ সম্পৰ্ক থকা কথাতো যদি মই কিবাকৈ গম পালোহেঁতেন, তেন্তে মই সিহঁতক পলাই যাবলৈ ক’লোহেঁতেন। মই তাইক কেতিয়াও ৰাজাৰ লগত বিয়া নিদিলোহেঁতেন।’
