মেঘালয়ত হানিমুনত এক ৰোমহৰ্ষক হত্যাকাণ্ডৰ ঘটনা। নৱবিবাহিত পত্নী সোণম ৰঘুবংশীৰ বিৰুদ্ধে স্বামী ৰাজা ৰঘুবংশীক হত্যা কৰাৰ অভিযোগ। এতিয়া তদন্তকাৰীৰ হাতলৈ আহিছে এটা নতুন ভিডিঅ’ ফুটেজ।
সংশ্লিষ্ট মহলৰ মতে, এই ফুটেজ সম্ভৱতঃ ৰাজা ৰঘুবংশী আৰু তেওঁৰ পত্নী একেলগে থকাৰ শেষ ফুটেজ। অনুমান কৰা হৈছে যে এই ভিডিঅ’টো ৰাজাক হত্যা কৰাৰ আৰু সোণম পলায়ন কৰাৰ কিছু সময়ৰ পূৰ্বে লোৱা হৈছিল।
সূত্ৰ অনুসৰি, এই ভিডিঅ’টো আন এজন পৰ্যটকৰ মোবাইল ফোনত শ্বুট কৰা হৈছে, যিয়েও একে অঞ্চলতে ট্ৰেকিং কৰি আছিল। সমগ্ৰ ঘটনা সংঘটিত হৈছে অজানিতে। ২৩ মে’ৰ পুৱা প্ৰায় ৯:৪৫ বজাত এজন পৰ্যটকে ৰেকৰ্ড কৰা ভিডিঅ’টোত সোণম আৰু ৰাজাক দেখা গৈছে।
ইপিনে, একেদিনাই সোণম আৰু তেওঁৰ প্ৰেমিক ৰাজ কুশৱাহাই সেইদিনা বিয়লি তিনিজন ভাড়াতীয়া হত্যাকাৰীৰ সৈতে ৰাজাক হত্যা কৰি নদীৰ ঘাটত পেলাই দিয়াৰ অভিযোগ উত্থাপন হৈছে।
দেৱ সিং নামৰ এজন পৰ্যটকে ইনষ্টাগ্ৰামত পোষ্ট কৰা ভিডিঅ’টোত সোণমক বগা টি-চাৰ্ট পিন্ধি আগবাঢ়ি যোৱা দেখা গৈছে। তাই হাতত লাঠি এখন লৈ আছিল। হাতত প্লাষ্টিকৰ বেগ এটা লৈ পিছফালে খোজ কাঢ়ি গৈ আছে ৰাজা। আনহাতে, ভিডিঅ’টোত সোণমক পিন্ধা দেখা পোৱা বগা টি-চাৰ্টটো আৰক্ষীয়ে ৰাজাৰ মৃতদেহৰ পৰা উদ্ধাৰ কৰে।
ভিডিঅ’টোৰ সন্দৰ্ভত দেৱে কয় যে, “মই ২৩ মে’ত মেঘালয় ভ্ৰমণৰ সময়ত এটা ভিডিঅ’ বনাইছিলো। কালি ভিডিঅ’টো চাই থাকোঁতে মই অজানিতে ইন্দোৰৰ এহাল দম্পতীক ভিডিঅ’টোত খোজ কাঢ়ি থকা দেখা গৈছে।”
মেঘালয় আৰক্ষীৰ তথ্য অনুসৰি, ৰাজা আৰু সোণম ২৩ মে’ৰ পুৱা প্ৰায় ৫:৩০ বজাত নাংৰিয়াটৰ শিপাৰা হোমষ্টেৰ পৰা ৰাওনা হৈছিল। তাৰ পিছত ট্ৰেকিংৰ বাবে চেৰাপুঞ্জীলৈ ৰাওনা হয়। ভাড়াতীয়া হত্যাকাৰী তিনিজনো ওচৰৰ হোমষ্টেত আছিল। তেওঁলোকো একে সময়তে ওলাই গৈছিল। বাটত সোণম আৰু ৰাজাই হত্যাকাৰী তিনিজনক লগ পায়। অজানিতে ৰাজাই হত্যাকাৰীৰ লগত কথা পাতিবলৈ ধৰে। তাৰ পাছত সুযোগ বুজি তিনিওজনে ৰজাক হত্যা কৰি এটা খাৱৈত পেলাই দিয়ে। ২ জুনত ৰাজাৰ মৃতদেহ উদ্ধাৰ হয়।তাৰ পিছতে সোণমো ধৰা পৰে।
সোণম আৰু ৰাজা ৰঘুবংশীৰ বিয়া হৈছিল ইন্দোৰত। যোৱা ২০ মে’ত হানিমুনৰ বাবে মেঘালয়ত উপস্থিত হৈছিল। ২৩ মে’ত নিৰুদ্দেশ হোৱা বুলি জানিব পৰা গৈছিল। ২ জুনত মেঘালয়ৰ খাৱৈৰ পৰা ৰাজা ৰঘুবংশীৰ মৃতদেহ উদ্ধাৰ কৰাৰ বিপৰীতে পত্নী সোণম ৰঘুবংশী সন্ধানহীন হৈ আছিল। ৯ জুনৰ পুৱা উত্তৰ প্ৰদেশৰ গাজীপুৰত তেওঁক বিচাৰি উলিয়াই গ্ৰেপ্তাৰ কৰা হয়।
সোণমৰ প্ৰেমিক ৰাজ কুশৱাহা আৰু ৰাজা ৰঘুবংশীক হত্যা কৰা আন তিনিজনকো গ্ৰেপ্তাৰ কৰা হয়। গ্ৰেপ্তাৰৰ পিছত সোণমে দাবী কৰে যে তেওঁক ড্ৰাগছ সেৱন কৰি অপহৰণ কৰি গাজীপুৰত পেলাই দিয়া হৈছিল। অৱশ্যে আৰক্ষীয়ে আত্মসমৰ্পণ কৰা বুলি জানিবলৈ দিয়ে। অভিযুক্তক মেঘালয় আৰক্ষীক গতাই দিয়ে।
জানিব পৰা মতে, আৰক্ষীৰ জিম্মাত থকা সোণমে স্বামী ৰাজা ৰঘুবংশীৰ হত্যাকাণ্ডৰ লগত জড়িত থকাৰ কথা স্বীকাৰ কৰে । ইপিনে, সোণম আৰু ৰাজা ৰঘুবংশীৰ পৰিয়ালে আটাইকেইজন অভিযুক্তৰ লগতে সোণমকো মৃত্যুদণ্ডৰ দাবী জনাইছে।
