ৰাজস্থানৰ কোটাত আৱদ্ধ হৈ থকা অসমৰ ৩৯১ গৰাকী শিক্ষাৰ্থীক অসমলৈ লৈ অহা বাছ কেইখনে আজি পুনৰ ৰাজস্থানলৈ ওভটনি যাত্ৰা আৰম্ভ কৰে।
২৭ এপ্ৰিলৰ পুৱতি নিশা অসমৰ শিক্ষাৰ্থী সকলক লৈ গুৱাহাটীৰ সৰুসজাইত উপস্থিত হৈছিল বাছ কেইখন।
ইপিনে, ছাত্ৰ-ছাত্ৰীৰ দলটোক লৈ অহা বাছ কেইখনে উভতি যোৱাৰ সময়ত ল’কডাউনৰ বাবে অসমত আৱদ্ধ হৈ থকা ৰাজস্থানৰ প্ৰায় ২৩০ জন যাত্ৰীক স্বৰাজ্যলৈ লৈ যাব।
পুৰ্বোত্তৰ পৰিষদীয় মাৰোৱাৰী সন্মিলনে ৰাজ্য চৰকাৰৰ সৈতে যোগাযোগ কৰাত ৰাজ্য চৰকাৰৰ তৰফৰ পৰা যাত্ৰী সকলক লৈ যোৱাৰ বাবে অনুমতি প্ৰদান কৰা হয়।
আনহাতে, পুৰ্বোত্তৰ পৰিষদীয় মাৰোৱাৰী সন্মিলনে এই ক্ষেত্ৰত ৰাজস্থান চৰকাৰৰ পৰা অনুমতি লাভ কৰিছে বুলিও জানিবলৈ দিয়ে।
উল্লেখযোগ্য যে, মহানগৰীৰ সোণাৰাম খেলপথাৰৰ পৰা ৰাজস্থানৰ যাত্ৰী সকলক লৈ ১৮ খন বাছ ইতিমধ্যে ৰাজস্থানলৈ ৰাওনা হৈছে।
বাছ সমূহত উঠাৰ পূৰ্বে যাত্ৰী সকলক মাস্ক, চেনিটাইজাৰ আৰু পানী বটল প্ৰদান কৰা হৈছে।
বাছ কেইখনে যাত্ৰা আৰম্ভ কৰাৰ সময়ত অসম আৰক্ষীৰ বহু কেইজন উচ্চপ্ৰদস্ত বিষয়া উপস্থিত থাকে।
