পৰীক্ষাগাৰত ড্ৰাগছ উৎপাদন! ১৩ কোটি টকাৰ ড্ৰাগছ বিক্ৰী কৰাৰ অপৰাধত গ্ৰেপ্তাৰ দুজন বিজ্ঞান শিক্ষক
এজন চৰকাৰী বিদ্যালয়ৰ বিজ্ঞান শিক্ষক আৰু আনজন পদাৰ্থ বিজ্ঞানৰ শিক্ষক। বৰ্তমান দুয়োজনে মিলি এটা কোচিং চেণ্টাৰ চলাই আহিছে। কিন্তু ড্ৰাগছ প্ৰস্তুত আৰু বিক্ৰীৰ অভিযোগত গ্ৰেপ্তাৰ হৈছে এই দুই শিক্ষকক। অভিযোগ অনুসৰি, তেওঁলোকে নিষিদ্ধ মেফেড্ৰন (এম ডি) নামৰ কৃত্ৰিম ড্ৰাগছ প্ৰস্তুত কৰি বিক্ৰী কৰিছিল।
এইদৰে দুয়োগৰাকী শিক্ষকে প্ৰায় ১৫ কোটি টকাৰ ড্ৰাগছ উৎপাদন কৰিছিল আৰু প্ৰায় ১৩ কোটি টকাৰ ড্ৰাগছ ইতিমধ্যে বিক্ৰী কৰা বুলি জানিবলৈ। ৰাজস্থানত সংঘটিত হৈছে এই ঘটনা।
উল্লেখযোগ্য যে, মেফেড্ৰন বা এম ডি এবিধ কৃত্ৰিম উদ্দীপক ঔষধক ‘বোম্বাৰ্ডি’ নামেৰে জনাজাত এই নিষিদ্ধ ড্ৰাগছৰ প্ৰতি লোকৰ আসক্তি অতি দ্রুত বৃদ্ধি পায়। এই নিষিদ্ধ ড্ৰাগছৰ ব্যৱসায়ৰ জৰিয়তে দুয়োগৰাকীয়ে বিপুল ধন উপাৰ্জনৰ চেষ্টা চলাইছিল।
এনচিবিয়ে জনোৱা মতে, ধৃত লোকসকলৰ নাম মনোজ ভাৰ্গৱ আৰু ইন্দ্ৰজিৎ বিষ্ণোই। দুয়োৰে বয়স ২৫ বছৰ। ৰাজস্থানৰ গংগাসাগৰ জিলাৰ এখন উচ্চতৰ মাধ্যমিক বিদ্যালয়ত শিক্ষকতা কৰে মনোজে। ইন্দ্ৰজিৎ এজন পদাৰ্থ বিজ্ঞানৰ শিক্ষক। তেওঁ কোচিং চেণ্টাৰত শিক্ষক। ৰাজস্থান প্ৰশাসনিক সেৱাৰ পৰীক্ষাৰ বাবেও তেওঁ প্ৰস্তুতি চলাইছে। অভিযোগ অনুসৰি, ভাড়াতীয়া ফ্লেটত পৰীক্ষাগাৰ স্থাপন কৰি দুয়োজনে ড্ৰাগছ তৈয়াৰ কৰিছিল।
এনচিবিৰ তদন্তত পোহৰলৈ আহিছে যে দুয়োজন বন্ধুৱে আগতে দিল্লীৰ পৰা ৰাসায়নিক সামগ্ৰী ক্ৰয় কৰিছিল। জেৰাৰ সময়ত তেওঁলোকে স্বীকাৰ কৰে যে যোৱা ডেৰ-দুমাহত তেওঁলোকে প্ৰায় পাঁচ কিলোগ্ৰাম এম ডি ঔষধ উৎপাদন কৰিছে। উৎপাদিত ঔষধৰ বজাৰ মূল্য ১৫ কোটি টকা হ’ব বুলি অনুমান কৰা হৈছে। ইয়াৰে ৪ কেজিতকৈ অধিক ঔষধো বজাৰত বিক্ৰী হৈছিল। বাকী ৭৮০ গ্ৰাম ড্ৰাগছ উদ্ধাৰ কৰা হৈছে। দুয়োগৰাকী শিক্ষকৰ পৰীক্ষাগাৰৰ পৰা জব্দ কৰা হৈছে সকলো ৰাসায়নিক সামগ্ৰী। এই ড্ৰাগছ উৎপাদন আৰু সৰ্বৰাহৰ সৈতে লগত জড়িত সকলক বিচাৰি তদন্ত অব্যাহত ৰাখিছে।