দিনটো আছিল ১৯৯১ চনৰ ২১ মে’। সেই অভিশপ্ত দিনটোতে দেশৰ প্ৰাক্তন প্ৰধানমন্ত্ৰী ৰাজীৱ গান্ধীক বোমা বিস্রোৰণ ঘটাই হত্যা কৰিছিল তামিল বিদ্ৰোহী সংগঠন এলটিটিইয়ে। ৰাজীৱ হত্যাৰ বহু বছৰ পাৰ হৈ যোৱাৰ পিছত সেই বৰ্বৰ হত্যাকাণ্ডত জড়িত কেউজন অপৰাধীকে কাৰাগাৰৰ পৰা মুকলি কৰি দিয়াৰ নিৰ্দেশ দিলে উচ্চতম ন্যায়ালয়ে।
ন্যায়ালয়ে আজি গোচৰটোৰ ছয়জন অপৰাধীৰ আবেদনৰ ভিত্তিত তেওঁলোকক মুক্তি দিয়াৰ নিৰ্দেশ দিয়ে। মুক্তি লাভ কৰা হত্যাকাৰী কেইগৰাকীৰ হ’ল নলিনী শ্ৰীহৰণ, ৰবিচন্দ্ৰন, শান্তন, মুৰুগান, ৰবাৰ্ট পায়াছ আৰু জয়কুমাৰ। এই গোচৰটোৰ আন এজন আজীৱন দোষী পেৰাৰিভালনক উচ্চতম ন্যায়ালয়ে এই বছৰৰ মে’ মাহত মুকলি কৰি দিছিল। ৰাজীৱ হত্যাকাণ্ডৰ গোচৰত নলিনী আৰু অন্যান্য দোষীকো আজীৱন কাৰাদণ্ড বিহা হৈছিল।
তেওঁলোক ২৩ বছৰ বা ততোধিক সময় কাৰাগাৰত আছে। আদালতৰ ৰায়ৰ পিছতে নলিনীয়ে কয়, “মই সন্ত্ৰাসবাদী নহয়। উল্লেখ্য ১৯৯১ চনৰ ২১ মে’ত তামিলনাডুৰ শ্ৰীপেৰামবাদুৰত এক নিৰ্বাচনী জনসভাত এক আত্মঘাতী বোমা বিস্ফোৰণত প্ৰাক্তন প্ৰধানমন্ত্ৰী ৰাজীৱ গান্ধী নিহত হৈছিল। প্ৰথমে আদালতে গোচৰটোত সাতজন লোকক দোষী সাব্যস্ত কৰিছিল আৰু তেওঁলোকক মৃত্যুদণ্ড বিহিছিল।
উক্ত সাত গৰাকী লোকেই ক্ষমা বিচাৰি ৰাষ্ট্ৰপতিৰ ওচৰত আবেদন জনাইছিল। ২০১৪ চনত উচ্চতম ন্যায়ালয়ে বিষয়টো সন্দৰ্ভত সিদ্ধান্ত লোৱাত পলম হোৱাৰ বাবে মৃত্যুদণ্ড আজীৱন কাৰাদণ্ডলৈ পৰিৱৰ্তন কৰিছিল। ২০১৮ চনত তামিলনাডুৰ তদানীন্তন এডিএমকে চৰকাৰৰ কেবিনেটে সময়ৰ আগতে আজীৱন কাৰাদণ্ডৰে দণ্ডিত দোষী কেইজনক মুক্তি দিয়াৰ সিদ্ধান্ত লৈছিল।
সেই সময়ত সিদ্ধান্তটো তামিলনাডুৰ তদানীন্তন ৰাজ্যপাল বনোৱাৰীলাল পুৰোহিতলৈ প্ৰেৰণ কৰা হৈছিলআৰু ৰাজ্যপালে সিদ্ধান্তটো বিবেচনাৰ বাবে ৰাষ্ট্ৰপতিলৈ প্ৰেৰণ কৰিছিল। ৰাজ্যপালে বিষয়টোত সন্মতি নিদিয়াৰ পিছত পেৰাৰিভালনে উচ্চতম ন্যায়ালয়ৰ কাষ চাপিছিল। পিছত মাদ্ৰাজ উচ্চ ন্যায়ালয়ে নলিনীক উচ্চতম ন্যায়ালয়ত আপীল কৰিবলৈ পৰামৰ্শ দিছিল। এক দীঘলীয়া সময়ৰ পিছত অৱশেষত আজি ৰাজীৱ হত্যাকাৰীসকলক কাৰাগাৰৰ পৰা মুক্তি দিয়াৰ নিৰ্দেশ দিয়ে উচ্চতম ন্যায়ালয়ে।
