শনিবাৰে ইডেনত কিং খানৰ দ্বাৰা ৰাজকীয় উদ্বোধনী অনুষ্ঠান অনুষ্ঠিত হয়। কিন্তু বেটেৰে ধুমুহাৰ সৃষ্টি কৰি শেষ হাঁহি মাৰিলে আন এজন ‘কিং’য়ে। তেওঁ হৈছে কোহলী। ইডেনত কোহলী আৰু নাইটছৰ প্ৰাক্তন খেলুৱৈ ফিল ছল্টক আগ্ৰাসী ৰূপত দেখা গৈছিল। এই যুটিটোৰ পৰাক্ৰমেৰে আৰচিবিয়ে অনায়াসে জয়ী হ’বলৈ সক্ষম হ’ল। কেকেআৰক ৭ উইকেটত পৰাস্ত কৰি আইপিএলৰ অভিযান আৰম্ভ কৰে বাংগালুৰুৱে।
আৰচিবিৰ অধিনায়ক ৰজত পাটিদাৰে টছত জয়লাভ কৰি ইডেন গাৰ্ডেনত প্ৰথমে বলিং কৰাৰ সিদ্ধান্ত লয়। আৰম্ভণিতে কুইণ্টন ডি ককৰ উইকেট হেৰুৱালেও অধিনায়ক অজিংকা ৰাহানে আৰু সুনীল নাৰিনে নাইটছৰ ইনিংছ নিয়ন্ত্ৰণ কৰে। এই যুটিৰ পাৰ্টনাৰশ্বিপেৰে ১০০ ৰানৰ ওপৰত উপনীত হয়।
কিন্তু তাৰ পিছত আৰ চি বিৰ স্পিনাৰ ক্ৰুনাল পাণ্ডিয়াই নিজৰ যাদু দেখুৱাবলৈ আৰম্ভ কৰিলে। প্ৰথমে ৰছিক দাৰে নাৰিনক আউট কৰে (৪৪)। ক্ৰুনালৰ বলত কেচ দি অৰ্ধশতক অৰ্জন কৰি উভতি আহে ৰাহানে।
তাৰ পিছত মিডল অৰ্ডাৰ প্ৰায় ভাঙি পৰিল। ক্ৰুনালে ভেংকটেশ আয়েৰ আৰু ৰিংকু দুয়োকে বল্ড কৰে। ৰাছেলে নিজৰ ‘পেশী শক্তি’ দেখুৱাব পৰা নাছিল। ৰাছেলক আউট কৰে স্পিনাৰ সুৱেশ শৰ্মাই।
নাইটছৰ ১ উইকেটত ১০৭ ৰানৰ পৰা ১৫০ ৰানৰ ভিতৰত ৬ উইকেটত হেৰুৱায়। শেষৰ ফালে অংগকৃশ ৰঘুবংশীয়ে কিছু পৰিমাণে মোকাবিলা কৰিবলৈ সক্ষম হ’ল। অৱশেষত নাইটছৰ ইনিংছ ৮ উইকেট হেৰুৱাই ১৭৪ ৰানত শেষ হয়।
যোৱাবাৰ ইডেন আছিল বেটছমেনৰ স্বৰ্গ। ১৭৫ ৰানৰ লক্ষ্য তাত ডাঙৰ কথা নহয়। দুজন অ’পেনাৰ ফিল ছল্ট আৰু বিৰাট কোহলিয়ে তাক আৰু সৰু কৰি দেখুৱালে। প্ৰথম জন নাইটৰ প্ৰাক্তন খেলুৱৈ। অধিক স্পষ্টভাৱে ক’বলৈ গ’লে যোৱাবাৰ কেকেআৰ চেম্পিয়ন হোৱাৰ মূল হোতা আছিল ছল্ট। এইবাৰ আৰ চি বিয়ে নিলামৰ টেবুলৰ পৰা তেওঁক কিনি নিলে। আৰু যেন বুজাই দিলে কেকেআৰে কি ভুল কৰিলে!
আনহাতে ‘কিং’ কোহলী। টি-২০ৰ পৰা অৱসৰ লৈছে। কেতিয়াবা ফৰ্মক লৈও কটুক্তি শুনিবলৈ পাইছে। সেই সকলোবোৰ তেওঁ বাউণ্ডেৰিৰ বাহিৰলৈ পঠিয়াই দিলে। কিছুদিন আগতেও ৰহস্যময় যেন লগা বৰুণে ৰাণৰ জোলোঙাটো খুলি দিলে। ছল্টে তেওঁৰ এটা অভাৰত তিনিটা চাৰি আৰু এটা ছয় মাৰে। যোৱাবাৰৰ আক্ৰমণাত্মক হৰ্ষিত ৰাণাক একেবাৰে অসহায় যেন লাগিল।
বৈভৱ অৰোৰাৰ অৱস্থা আটাইতকৈ বেয়া। তেওঁ এটা অভাৰত ২০ ৰান দিয়ে। প্ৰথম ৬ অভাৰতে ৮০ ৰান সংগ্ৰহ কৰে আৰচিবিয়ে। মেচখন ঠিক তাতেই প্ৰায় আধা জয়ী হৈছিল। বিৰাট ৰাজত্বৰ মাজত কেকেআৰৰ অধিনায়ক ৰাহানেৰ অসহায় মুখ বা শ্বাহৰুখ খানৰ হতাশ মুখখনলৈ চাই এনে লাগিছিল যেন ইয়াতেই সকলো শেষ।
ছল্টে ৫৬ ৰান কৰি উভতি গ’লেও কোহলী থাকিল। তেওঁ আকৌ এবাৰ প্ৰমাণ কৰিলে যে তেওঁক কিয় ‘চেজমাষ্টাৰ’ বুলি কোৱা হয়। তেওঁ শেষত ৫৯ ৰানত অপৰাজিত হৈ থাকে। দেৱদত্ত পাদিক্কল, ৰজত পাটিদাৰ আৰু লিভিংষ্টোনেও সংগ দিয়ে। অৱশেষত হাতত ২২টা বল বাকী থকা অৱস্থাত ৭ উইকেটত জয়লাভ কৰে আৰ চি বিয়ে।
সংক্ষিপ্ত স্কোৰঃ
কলকাতা নাইট ৰাইডাৰ্ছঃ ১৭৪/৮ (ৰাহানে ৫৬, নাৰিন ৪৪, ক্ৰুনাল ২৯/৩)
ৰয়েল চেলেঞ্জাৰ্ছ বাংগালুৰুঃ ১৭৭/৩ (কোহলী ৫৯, ছল্ট ৫৬, নাৰিনে ২৭/১)
আৰ চি বিয়ে ৭ উইকেটত জয়লাভ কৰে।
