এন এছ চি এন (কে)ই অপহৰণ কৰা বুলি অভিযোগ উঠা অৰুণাচল প্ৰদেশৰ লংডিঙৰ এন পি পি কৰ্মী দুগৰাকীয়ে মুক্তি লাভ কৰিছে আৰু সমষ্টিটোৰ এটা ভোটকেন্দ্ৰত শনিবাৰে অনুষ্ঠিত বিধানসভাৰ পুনৰ ভোটগ্ৰহণ শান্তিপূৰ্ণভাৱে সমাপ্ত হৈছে।
যোৱা ১১ এপ্ৰিলত বিজেপি-এন পি পিৰ সংঘাতৰ বাবে লংডিং পুমাও সমষ্টিৰ অন্তৰ্গত লংখাও ভোটকেন্দ্ৰত ভোটগ্ৰহণ স্থগিত ৰাখি শনিবাৰে পুনৰ ভোটগ্ৰহণ কৰা হৈছিল।
আপং ৱাংচু আৰু য়াটুন ৱাংচু নামৰ অপহৃত কৰ্মী দুজনক যোৱা ১৭ এপ্ৰিলৰ নিশাই মুকলি কৰি দিয়া হৈছিল বুলি শেহতীয়াকৈ জানিব পৰা গৈছে।
সমৰ্থক দুগৰাকীক এন এছ চি এন (কে)ই অপহৰণ কৰা বুলি এন পি পি প্ৰাৰ্থী থাংৱাম বাংহামে লংডিং আৰক্ষী থানাত ভাৰতীয় দণ্ডবিধিৰ ৩০৫ / ৫০৬ / ৩৪ ধাৰা আৰু ডব্লিউ এছ ১০ / ১৩ ইউ এ পি আইনৰ অধীনত গোচৰ ৰুজু হৈছে৷
নিৰ্বাচনী বৈতৰণী পাৰ হ’বলৈ শাসকীয় বিজেপিৰ একাংশ প্ৰাৰ্থীয়ে নাগা বিদ্ৰোহী সংগঠনটোৰ সৈতে গোপন বুজাবুজি কৰা বুলিও তেওঁ অভিযোগ কৰিছিল।
বাংহামে বিজেপি প্ৰাৰ্থীগৰাকীৰ বিৰুদ্ধে বিহিত ব্যৱস্থা গ্ৰহণৰ দাবী জনাইছিল।
এজাহাৰখনত ৱাংহামে উল্লেখ কৰিছিল যে লংডিং জিলাৰ লংখাউ ভিলে’জ এলেকাত ৩০গৰাকী এন এছ চি এন (কে)ৰ কেডাৰ আৰু ১০ গৰাকী এন এছ চি এন (আই এম)ৰ কেডাৰে বাহৰ পাতি বিজেপি দলৰ হৈ কাম কৰি আছে৷
