১৫ কোটি টকাৰে চীনৰ পৰা সংগ্ৰহ কৰা এই ৫০,০০০ পি পি ই কীটৰ হিচাপ এতিয়া মুখ্যমন্ত্ৰীয়ে দিব লাগে।
আজি অসম তৃণমূল কংগ্ৰেছৰ সভাপতি ৰিপুন বৰাই সংবাদ মাধ্যমৰ আগত কয় যে, ২০২০ চনৰ ক’ভিড মহামাৰীয়ে আক্ৰান্ত কৰা আমাৰ ৰাজ্যৰ জনতাক আশা আৰু প্ৰত্যয় জন্মাবলৈ সেই সময়ৰ অসম চৰকাৰৰ বিত্ত আৰু স্বাস্থ্য মন্ত্ৰী, বৰ্তমান ৰাজ্যখনৰ মূখ্যমন্ত্ৰী ড০ হিমন্ত বিশ্ব শৰ্মাই বিভিন্ন পদক্ষেপ হাতত লোৱা বুলি প্ৰচাৰ হৈছিল। এনে এক পদক্ষেপ হিচাপে ক’ভিড মহামাৰীৰ লগত যুজ দিবলৈ অত্যাৱশ্যকীয় আহিলা ৰূপে ব্যৱহাৰ হোৱা পিপিই কীট ক্ৰয় কৰাৰ বাতৰিও প্ৰচাৰিত হৈছিল।
এইদৰে চীন দেশৰ পৰা ১৫ কৌটি টকাৰে ৫০০০০ পিপিই কীট ক্ৰয় কৰিছিল বুলি প্ৰচাৰ হৈছিল, আনকি স্বয়ং আজিৰ মূখ্যমন্ত্ৰী জনে তেতিয়া স্বাস্থ্য মন্ত্ৰী হৈ থাকোতে ১৫ এপ্ৰিল ২০২০ তাৰিখে মাজনিশা বিমানবন্দৰত গৈ সেই পিপিই কীট গ্ৰহণ কৰিছিল বুলি কোৱা হৈছিল। কিন্তু আজি আৰ টি আইৰ তথ্যৰ ভিত্তিত সংবাদ মাধ্যমত প্ৰচাৰ হৈছে যে সেই সময়ত চীনৰ পৰা সংগ্ৰহ কৰা কোনো পিপিই কীটৰ তথ্য এনএইছএম বিভাগৰ হাতত নাই।
ক’ভিডৰ সময়ত প্ৰয়োজন হোৱা সকলো সামগ্ৰী তথা ঔষধ, মাক্স আদি ৰাষ্ট্ৰীয় স্বাস্থ্য অভিযানৰ যোগেদিয়েই ক্ৰয় কৰা হৈছিল।দুটাকৈ সংবাদ গোষ্ঠীয়ে প্ৰকাশ কৰা তথ্য যদি সঁচা হয়, তেনেহলে এনে কাৰ্যৰ উচিত তদন্ত হ’ব লাগে আৰু কি চমক সৃষ্টি কৰিবলৈ এনে মিছাৰ আশ্ৰয় কিয় লৈছিল সেয়া স্পষ্ট কৰিব লাগে।
আজিৰ মুখ্যমন্ত্ৰী জনে সেই সময়ৰ স্বাস্থ্য আৰু বিত্ত বিভাগৰ মন্ত্ৰী হৈ কি শিতানৰ ধনেৰে কোন প্ৰতিষ্ঠানৰ পৰা এই ৫০০০০ পিপিই কীট ক্ৰয় কৰি ক’ত ৰাখিলে আৰু কি কৰিলে সেয়া শ্বেতপত্ৰ প্ৰকাশ কৰি জনাব লাগে। লগতে ক’ভিড কালত হোৱা আয়-ব্যয়ৰ হিচাপ ৰাজহুৱা কৰিবলৈও বৰাই দাবী জনায়।
