অধিনায়ক ৰিয়ান পৰাগৰ দুৰ্দান্ত প্ৰদৰ্শনৰ সহায়ত চলি থকা চৈয়দ মুস্তাক আলী ট্ৰফীত অসমে বংগক ১৩ৰাণত পৰাজিত কৰে।
কলকাতাৰ ইডেন গাৰ্ডেনত টছত জিকি প্ৰথম বেটিং কৰে অসমে। নিৰ্দ্ধাৰিত ২০ অ’ভাৰত অসমে ৫উইকেটৰ বিনিময়ত ১৫৭ৰাণ কৰে।
ৰিয়ান পৰাগে ৫৪টা বলত ৭৭ৰাণ কৰি অপৰাজিত হৈ থাকে। ৰিয়ানৰ বিস্ফোৰক ইনিংছটোত আছিল ৫টা চাৰি আৰু ৫টা ছয়।
ৰিয়ানৰ বাহিৰে অসমৰ হৈ দীনেশ দাসে ৩৪, পল্লব কুমাৰ দাসে ২০ আৰু এৰিক ৰায়ে অপৰাজিত ১৯ৰাণ কৰে।
এইবাৰৰ মুস্তাক আলী ট্ৰফীত ৰিয়ান পৰাগে দুৰ্দান্ত প্ৰদৰ্শন আগবঢ়াবলৈ সক্ষম হৈছে। হায়ৰাবাদৰ বিৰুদ্ধে ৰিয়ানে অপৰাজিত ৫১ৰাণ কৰাৰ লগতে এটা উইকেটো লাভ কৰিছিল।
তামিলনাডুৰ বিৰুদ্ধে ৰিয়ানে সংগ্ৰহ কৰিছিল ২৪ৰাণ। কিন্তু ঝাৰখণ্ডৰ বিৰুদ্ধে তেওঁ ৬৭ৰাণৰ এটি অনবদ্য ইনিংছ খেলিছিল।
ইপিনে বংগৰ বিৰুদ্ধে খেলা মেচখনত বিস্ফোৰক বেটিঙৰ লগতে বলিঙতো ২৮ৰাণৰ বিনিময়ত ২টা উইকেট দখল কৰিবলৈ সক্ষম হয় ৰিয়ানে।
আনহাতে, বংগৰ হৈ ইশান পোড়েলে ২টা আৰু শাহবাজ আহমেদ, মুকেশ কুমাৰ আৰু ঋত্বিক চেটাৰ্জীয়ে এটাকৈ উইকেট দখল কৰে।
অসমৰ ১৫৭ৰাণৰ টাৰ্গেট অতিক্ৰম কৰাৰ লক্ষ্যেৰে বেটিং কৰিবলৈ নামি বংগৰ দলটো নিৰ্দ্ধাৰিত ২০ অভাৰত ৮টা উইকেটৰ বিনিময়ত ১৪৪ৰাণহে কৰিবলৈ সক্ষম হয়।
বংগৰ হৈ অনুষ্টুপ মজুমদাৰে সৰ্বোচ্চ ৪৮ৰাণ কৰি অপৰাজিত হৈ থাকে। তদুপৰি, মনোজ তিৱাৰীয়ে ৩৩ৰাণ, শ্ৰীবৎস গোস্বামীয়ে ১৬ আৰু বিবেক সিঙে ২১ ৰাম কৰে।
অসমৰ হৈ প্ৰীতম দাসে তিনিটা উইকেট দখল কৰে।
