নগাঁও জিলাৰ পুৰণিগুদামৰ হয়বৰগাঁৱত সোমবাৰে নিশা এক ভয়ংকৰ পথ দুৰ্ঘটনা সংঘটিত হয়। দুৰ্ঘটনাটোৰ ফলত ৪ গৰাকীকৈ লোক গুৰুতৰভাৱে আহত হয়।
প্ৰাপ্ত তথ্য মতে কালি নিশা প্ৰায় ৮ মান বজাত কলিয়াবৰ অভিমুখী এ এছ-০১ এফ চি-১৪৫৭ নম্বৰৰ এখন দ্ৰুতবেগী ১০২এম্বুলেঞ্চে আৰু ৩৭নং ৰাষ্ট্ৰীয় ঘাইপথৰ ওপৰত ৰখাই থোৱা এখন এ এছ -০১ জে চি -২০৩৭ নম্বৰৰ টাটা মিনি ট্ৰাকৰ মাজত মুখামুখী সংঘৰ্ষ লাগে।
ফলত দুয়োখন বাহনৰে ৪ গৰাকীকৈ ব্যক্তি গুৰুতৰভাবে আঘাতপ্ৰাপ্ত হোৱাৰ উপৰিও বহু সময় ধৰি বিধ্বস্ত মিনি ট্ৰাকখনৰ ভিতৰত বাহনখনৰ চালকজন আবদ্ধ হৈ থাকে।
অৱশ্যে পিছত স্থানীয় ৰাইজৰ সহযোগত গুৰুতৰভাবে আহত চালকজনক উদ্ধাৰ কৰি জৰুৰী চিকিৎসা প্ৰদানৰ বাবে নগাঁৱৰ ভোগেস্বৰী ফুকননী অসামৰিক চিকিৎসালয়লৈ প্ৰেৰণ কৰা হয়।
আনহাতে দুৰ্ঘটনাটোৰ বাবে ঘটনাস্থলীত কিছু সময়ৰ বাবে ৰাজপথত তীব্ৰ যানজঁটৰ সৃষ্টি হৈছিল যদিও পিছত পুৰণিগুদাম আৰক্ষীৰ এটা দল উপস্থিতহৈ পথটো মুকলি কৰি দিয়ে।
