এগৰাকী হিন্দু যুৱকৰ প্ৰেমত পাকিস্তানৰ পৰা ভাৰতলৈ পলায়ন কৰে এগৰাকী মুছলমান মহিলাই। মহিলা গৰাকীয়ে ভাৰতলৈ পলায়ন কৰাৰ প্ৰতিশোধ ল’বলৈ দুষ্কৃতিকাৰীয়ে পাকিস্তানৰ হিন্দু মন্দিৰত ৰকেট লঞ্চাৰে আক্ৰমণ কৰা হয়। ইমানেই নহয়, পাকিস্তানী মহিলাগৰাকীৰ সম্পৰ্কীয় লোকে মন্দিৰৰ আশে-পাশে থকা হিন্দু ঘৰবোৰতো প্ৰৱেশ কৰি গুলীচালনা কৰে। অৱশ্যে এই ঘটনাত কোনো হতাহতিৰ খবৰ পোৱা নাই। ঘটনা সংঘটিত হৈছে পাকিস্তানৰ সিন্ধ প্ৰদেশত।
এই ঘটনাত পাছতে পাকিস্তানৰ ধৰ্মীয় সংখ্যালঘুৰ নিৰাপত্তা সম্পৰ্কীয় বিষয়টো পুনৰ উত্থাপন হৈছে। এই ঘটনাৰ সমান্তাৰলভাৱে এটা শ্বপিং মল নিৰ্মাণৰ বাবে যোৱা শুকুৰবাৰে নিশা কৰাচীৰ ১৫০ বছৰীয়া এটা মন্দিৰ ভাঙি পেলোৱা হয় বুলিও সংবাদ মাধ্যমত প্ৰকাশ পাইছে।
ইফালে দেওবাৰে পুৱতি নিশা মন্দিৰত ৰকেট লঞ্চাৰ আক্ৰমণ সংঘটিত হয়। দক্ষিণ সিন্ধৰ কাছমোৰ অঞ্চলত অৱস্থিত এই মন্দিৰটো বছৰত এবাৰহে মুকলি কৰা হয়। গোটেই বছৰটো মন্দিৰটো বন্ধ কৰি ৰখা হয়।
দেওবাৰেও বন্ধ হৈ থাকে মন্দিৰটো। সেই সময়ত দুষ্কৃতিকাৰীৰ দল এটাই মন্দিৰলৈ ৰকেট লঞ্চাৰ নিক্ষেপ কৰিছিল। মন্দিৰৰ গাতে লাগি থকা হিন্দুৰ ঘৰতো আক্রমণ কৰে ৮-৯ জনীয়া দুষ্কৃতিকাৰীৰ দলটোৱে৷ অৱশ্যে এই ঘটনাত কোনো লোক আহত হোৱা নাই।
এই আক্ৰমণৰ খবৰ পোৱাৰ লগে লগে কাশ্মোৰ-কান্ধকোটৰ এছ এছ পি ইৰফান ছাম্মোৰ নেতৃত্বত এটা বৃহৎ আৰক্ষী বাহিনী ঘটনাস্থলীত উপস্থিত হয়। অৱশ্যে আৰক্ষীক দেখা পাই পলাই যায় দুষ্কৃতিকাৰীৰ দলটোৱে। আৰক্ষীয়ে তেওঁলোকৰ সন্ধানত অভিযান অব্যাহত ৰাখিছে।
কিন্তু আৰক্ষীৰ সূত্ৰ অনুসৰি দুষ্কৃতিকাৰীৰ দলটোৱে নিক্ষেপ কৰা ৰকেট লঞ্চাৰবোৰ বিস্ফোৰণ হোৱা নাছিল। আৰক্ষীৰ মতে হিন্দু মন্দিৰ অক্ষত আছে। অৱশ্যে স্থানীয় ৰাইজৰ সুৰক্ষা নিশ্চিত কৰিবলৈ বৃহৎ আৰক্ষী বাহিনী মোতায়েন কৰা হৈছে।
কিয় এনেদৰে আক্ৰমণ কৰিলে দুষ্কৃতিকাৰীয়ে? আৰক্ষীৰ সূত্ৰ অনুসৰি ইয়াৰ আঁৰত আছে PUBG-প্ৰেমৰ কাহিনী। অনলাইন গেম খেলি থকাৰ সময়তে এগৰাকী ভাৰতীয় যুৱকৰ প্ৰেমত পৰে এগৰাকী পাকিস্তানী গৃহিণী। তাৰ পিছত ভাৰতলৈ আহি বিয়া পাতি হিন্দু ধৰ্ম গ্ৰহণ কৰে।
সেই ঘটনাক লৈ দুয়োখন দেশৰ মাজত বিবাদ চলি আছে। তাৰ পৰিপ্ৰেক্ষিতত দুষ্কৃতিকাৰীয়ে কাশ্মোৰৰ হিন্দু জনসাধাৰণক ভাবুকি দিছিল। মন্দিৰটো ধ্বংস কৰাৰ উপৰিও স্থানীয় হিন্দুসকলে হত্যাৰ ভাবুকিও লাভ কৰিছিল। আৰক্ষীৰ মতে, এই ভাবুকি প্ৰমাণ কৰিবলৈ এই আক্ৰমণ সংঘটিত কৰা হৈছে।
