মহম্মদ ছামি; এতিয়া প্ৰত্যাৱৰ্তনৰ অৰ্থই যেন হৈ পৰিছে এই নামটো। বিশ্বকাপ অভিযানৰ প্ৰথম চাৰিখন মেচত বেঞ্চতে কটাবলগীয়া হোৱা অভিজ্ঞ বলাৰগৰাকী ২২ গজলৈ ঘূৰিয়েই এতিয়া হৈ পৰিছে কৌটি কৌটি ভাৰতীয়ৰ বিশ্বজয়ৰ স্বপ্নৰ সাৰথি, ৰোহিত শৰ্মাৰ হাতৰ ব্ৰহ্মাস্ত্ৰ!
সৌসিদিনা নিউজিলেণ্ডৰ বিপক্ষে পাঁচ উইকেটৰ চমৎকাৰী স্পেলেৰে ৰাজকীয় প্ৰত্যাৱৰ্তন আৰু আজি লক্ষ্ণৌত ইংলেণ্ডৰ বিৰুদ্ধে যেন তাৰেই পুনৰাবৃত্তি! চাৰিটাকৈ উইকেট দখলেৰে ইংৰাজ বাহিনীৰ বেটিং স্তম্ভত ধুমুহাৰ আঘাত হানি ছামি হৈ পৰিল জয়ৰ আন এক নায়ক।
এইপৰ্যন্ত অংশ লোৱা ছয়খন মেচৰ আটাইকেইখনতে জয়েৰে এতিয়া বিশ্বজয়ৰ অভিযানত ‘আনষ্টপেবল’ ভাৰত। আনহাতে ইংলেণ্ড! ডিফেণ্ডিং চেম্পিয়ন দলটো যেন বিচ্যুত হ’ল পথৰ পৰা। ইখনৰ পিছত সিখন মেচত জয়েৰে দলটোৱে প্ৰায় নিশ্চিত কৰি তুলিছে বিশ্বকাপৰ পৰা নিজৰেই বিদায়।
লক্ষ্ণৌৰ ২২ গজ আছিল আজি বলাৰৰ মেজিক শ্ব’ৰ থলী, আনহাতে বেটাৰৰ বধ্যভূমি। ল’ স্কৰিং মেচখনত প্ৰথমে বেটিং কৰি ভাৰতে ইংলেণ্ডৰ নিখুঁত বলিং আক্ৰমণত সংগ্ৰহ কৰিছিল মাত্ৰ ২২৯ ৰাণ। পিছে এই লক্ষ্যও ইংলেণ্ডৰ বাবে হৈ পৰিল শতযোজন দূৰ।
ভাৰতীয় বলিং আক্ৰমণৰ সুনিপুণ শৈল্পিকতাত খহি পৰা ইংৰাজ বাহিনীয়ে হাৰ মানিলে ১০০ ৰাণৰ ব্যৱধানত। ছামিৰ চমৎকাৰৰ লগতে বুমৰাহ, কুলদীপ, জাদেজাৰ লক্ষ্যভেদী বলিং আৰু ইফালে ৰোহিত শৰ্মাৰ অধিনায়কোচিত ইনিংছ, যাদৱ-ৰাহুলৰ সময়োচিত বেটিঙে দিলে ভাৰতক ক্ৰমাগত ষষ্ঠটো জয়।
টছত পৰাস্ত হৈ ইংৰাজ অধিনায়ক বাটলাৰৰ আমন্ত্ৰণক্ৰমে প্ৰথমে বেটিং কৰে ভাৰতে। পূৰ্বৰ আটাইকেইখন মেচতে লক্ষ্য অনুসৰণ কৰা ভাৰতৰ আজিৰ প্ৰথম বেটিঙৰ আৰম্ভণি সুখকৰ নাছিল। চল্লিশ ৰাণৰ অন্তৰালতে দলে হেৰুৱাইছিল তিনিটা উইকেট।
ব্যৰ্থ হৈ পেভিলিয়নমুখী হৈছিল গিল (৯), কোহলী (০) আৰু আয়াৰ (৪)। এই প্ৰাৰম্ভিক বিপৰ্যয়ৰ পৰা দলক উদ্ধাৰ কৰি ৰোহিতে ৰাহুলৰ সৈতে চতুৰ্থ উইকেটত বান্ধে ৯১ ৰাণৰ যুটী। ১৩১ ৰাণত ৰাহুলৰ (৩৯) বিদায়ৰ পিছত সূৰ্যকুমাৰ আৰু ৰোহিতে ১৬৪ লৈ আগুৱাই নিয়ে ইনিংছ।
৮৭ ৰাণৰ এক উদ্ধাৰকাৰী আৰু অধিনায়কোচিত চমকপ্ৰদ ইনিংছ দলক উপহাৰ দি বিদায় লয় ৰোহিতে। ইফালে ক্ৰীজত বেছিসময় নিটিকে জাদেজা (৮) আৰু ছামিও (১)। পাণ্ডিয়াৰ অনুপস্থিতিত দলত সুযোগ পোৱা সূৰ্যকুমাৰে খেলে ৪৯ ৰাণৰ এক সুন্দৰ ইনিংছ। বুমৰাহ (১৬), কুলদীপৰ (৯) বেটৰ পৰাও আহে গুৰুত্বপূৰ্ণ অৱদান।
ইফালে ২৩০ ৰাণৰ সহজ লক্ষ্য আগত লৈ ইংলেণ্ডে কৰিছিল এক সঠিক আৰম্ভণি। দুই অপেনাৰ মালান আৰু বেয়াৰষ্ট্ৰ’ৱে সুন্দৰকৈ ইনিংছ আৰম্ভ কৰি ৪.৩ অভাৰতে যোগ দিছিল ৩০ ৰাণ। কিন্তু বুমৰাহে অভাৰটোৰ অন্তিম দুটা বলত ক্ৰমে মালান (১৬) আৰু ৰুটৰ (০) উইকেট দখলেৰে ইংলেণ্ডক প্ৰাৰম্ভিক আঘাত দিয়ে।
ইয়াৰ পিছত ছামিয়ে ষ্ট’কচ (০) আৰু বেয়াৰষ্ট্ৰ’ক (১৪) পেভিলিয়নৰ পথ দেখুওৱাই ভাৰতৰ সম্ভাৱনাৰ দিশে সলনি কৰে মেচৰ গতি। দলীয় স্ক’ৰ ৫২ত কুলদীপ যাদৱে এক যাদুকৰী স্পীন ঘূৰ্ণীৰে বাটলাৰক স্তম্ভিত কৰি ষ্টাম্পত আঘাত হানি দলটোক অধিক বেকফুটলৈ ঠেলি দিয়ে।
এনে বিপৰ্যয়ৰ মাজতে মীন আলী আৰু লিভিংষ্ট’নে ইংৰাজ বাহিনীৰ বাবে কিছু আশাৰ সঞ্চাৰ কৰিছিল যদিও পুনৰ বল হাতত লৈয়ে এই আশাত বাধা হৈ পৰে ছামি। দলীয় স্ক’ৰ ৮১ত মঈন আলীক (১৫) বিদায় দিয়ে অভিজ্ঞ পেচাৰগৰাকীয়ে।
ইয়াৰ কিছু সময় পিছতে জাদেজাই ৱ’কছক (১০) আৰু কুলদীপে লিভিংষ্ট’নক (২৭) বিদায় দি বাৰতৰ জয় প্ৰায় নিশ্চিত কৰি তোলে। আনহাতে দুই পেচাৰ ছামি-বুমৰাহে ক্ৰমে আদিল ৰছিদ (১৩) আৰু মাৰ্ক উডৰ (০) ৰ উইকেট দখল কৰি ভাৰতক দিয়ে কিঞ্চিত জয়।
ব্যক্তিগত ১৬ ৰাণত অপৰাজিত থাকে উইলী। ভাৰতৰ হৈ ছামিয়ে ৪টা, বুমৰাহে ৩টা, কুলদীপে ২টা আৰু জাদেজাই এটা উইকেট লাভ কৰে। ৮৭ ৰাণৰ দৃষ্টিনন্দন তথা মেচ উদ্ধাৰকাৰী ইনিংছটোৰ বাবে ৰোহিত শৰ্মা হয় মেচৰ শ্ৰেষ্ঠ খেলুৱৈ।
এই জয়েৰে ভাৰতে ৬খন খেলৰ পৰা ১২ পইণ্ট লাভ কৰি পইণ্ট তালিকাৰ শীৰ্ষত উপনীত হয়। অহা বৃহস্পতিবাৰে অৰ্থাৎ ২ নৱেম্বৰত ৱানখেড়ে ষ্টেডিয়ামত শ্ৰীলংকাৰ বিৰুদ্ধে পৰৱৰ্তী মেচত অৱতীৰ্ণ হ’ব ভাৰত।
লক্ষণীয়ভাৱে শ্ৰীলংকাৰ বিপক্ষে এই মেচখনত জয়লাভ কৰিলেই একেৰাহে চতুৰ্থবাৰৰ বাবে এদিনীয়া বিশ্বকাপত ছেমিফাইনেলত প্ৰৱেশৰ পথ নিশ্চিত হ’ব ভাৰতৰ।
