২০২৫ চনৰ চেম্পিয়নছ ট্ৰফী আৰম্ভ হোৱাৰ পূৰ্বে ৰোহিত শৰ্মাৰ অধিনায়কত্ব আৰু বেটিংক লৈ যথেষ্ট সমালোচনা হৈছিল। অৱশ্যে চূড়ান্ত খেলখনত ৰোহিতে প্ৰতিটো সমালোচনাৰ যোগ্য প্ৰত্যুত্তৰ দিলে। চূড়ান্ত মেচত হিটমেনৰ বেটিং আক্ৰমণত নিউজিলেণ্ডৰ বলাৰসকলে একেবাৰে অসহায় হৈ পৰিছিল। অতি গুৰুত্বপূৰ্ণ সময়ত তেওঁ দলৰ দায়িত্ব লয় আৰু ৭৬ ৰানৰ এক চমকপ্ৰদ ইনিংছ খেলিলে। ৰোহিতৰ বেটিং দক্ষতাই বাস্তৱতে টিম ইণ্ডিয়াৰ জয়ৰ বাট মুকলি কৰি দিয়ে।
খেলৰ অন্তত ৰোহিতে কয়, ‘চেম্পিয়নছ ট্ৰফী জিকিব পাৰি বৰ ভাল লাগে। গোটেই প্ৰতিযোগিতাখনত আমি যথেষ্ট ভাল প্ৰদৰ্শন কৰিলোঁ। আমি এই ফলাফল লাভ কৰি অতিশয় আনন্দিত হৈছো। মই সাধাৰণতে ইমান আক্ৰমণাত্মক মুডত বেটিং নকৰো। কিন্তু, এই মেচখনত মই সেইটোৱেই কৰিব বিচাৰিছিলো। কিন্তু মোৰ পিছফালে সমগ্ৰ দল আৰু মেনেজমেণ্টৰ যথেষ্ট সমৰ্থন আছিল।’
তেওঁ লগতে কয়, ‘মই আগতে ৰাহুল ভাইৰ সৈতে এই বিষয়ত আলোচনা কৰিছো। এতিয়া গৌতি ভাইৰ লগতো কৰো। মোৰ তেনেকুৱা এটা ইনিংছ খেলিব মন গৈছিল। ইমান বছৰ ধৰি বিভিন্ন শৈলীত ক্ৰিকেট খেলি আহিছো। অৱশেষত আমি সেই ফলাফল পাইছো। প্ৰথম ৫-৬ অভাৰত কি কৰিব লাগিব সেই বিষয়ে মোটামুটি নিশ্চিত আছিলোঁ। মই হয়তো আগতে তেনেকৈ বেটিং কৰিবলৈ গৈ আউট হৈ আহিছো, কিন্তু আচল কথাটো হ’ল মই কেনেকৈ প্ৰদৰ্শন কৰিছো। এই দলটোৰ বেটিং গভীৰতাৰ বাবেই মই হাত খুলি খেলিব পাৰিছো। আঠ নম্বৰত বেটিং কৰিবলৈ আহে জাডেজা। ইয়াৰ ফলত আপোনাৰ আত্মবিশ্বাস বৃদ্ধি পাবই। মই কি কৰিম সেয়া মোৰ মনত স্পষ্ট হৈ পৰিছিল। সেই পৰিকল্পনা অনুসৰি মই বেটিং কৰিছিলো।’
উল্লেখ্য যে এই মেচখনত ৰোহিতে বিধ্বংসী বেটিং প্ৰদৰ্শন কৰিছিল। আনহাতে, হিটমেনৰ অধিনায়কত্বৰ বিষয়ে ক’বলগীয়া বিশেষ একো নাই। সেই দৃশ্য ফাইনেল মেচতো দেখা গৈছিল। ভাৰতীয় ক্ৰিকেট দলে ৰোহিতৰ অধিনায়কত্বত নিউজিলেণ্ডক ২৫১ ৰানত সীমাবদ্ধ কৰি ৰাখিছিল। যদিও গোটেই টুৰ্ণামেণ্টখনত ৰোহিতৰ বেটে তেনেকৈ বিস্ফোৰণ ঘটোৱা নাছিল, কিন্তু চূড়ান্ত মেচত উজলি উঠিল। তদুপৰি তেওঁৰ নেতৃত্বত টিম ইণ্ডিয়াই একেৰাহে ২টাকৈ আই চি চি খিতাপ দখল কৰিলে।
