গুৱাহাটীস্থ আঞ্চলিক বিজ্ঞান কেন্দ্ৰত অহা ৯ ফেব্ৰুৱাৰিৰ পৰা আৰম্ভ হ’ব বাৰ্ষিক ‘উদ্ভাৱনী মহোৎসৱ’। আঞ্চলিক বিজ্ঞান কেন্দ্ৰটোৰ চৌহদত থকা নেশ্যনেল ইন্নোভেশন ফাউণ্ডেশ্যনৰ সহযোগত এই দুদিনীয়া কাৰ্যসূচী পালিত হ’ব।
দ্য আছাম ট্ৰিবিউনত প্ৰকাশিত এটা প্ৰতিৱেদনত প্ৰকাশ পোৱা মতে এই উদ্ভাৱনী মহোৎসৱে উত্তৰ পূৰ্বাঞ্চলৰ উদ্ভাৱনক, শিল্পী, পাৰফৰ্মাৰ, কাৰুশিল্পী, বিজ্ঞান প্ৰদৰ্শক সকলক এখন উমৈহতীয়া মঞ্চ প্ৰদান কৰিব।
বিভিন্ন ক্ষেত্ৰৰ উদ্ভাৱক, কাৰুশিল্পী, স্ব প্ৰশিক্ষিত উদ্ভাৱকসকলে এই ‘উদ্ভাৱনী মহোৎসৱ’ত অংশগ্ৰহণ কৰিব। উত্তৰ পূৰ্বাঞ্চলৰ বিভিন্ন স্থানৰ পৰা অহা কাৰুশিল্পী আন আন বিশেষজ্ঞসহ প্ৰায় ৫০ গৰাকী উদ্ভাৱকসকলে অংশগ্ৰহণ কৰি ইয়াত তেওঁলোকৰ উৎপাদিত সামগ্ৰী, যন্ত্ৰ অথবা একক সৃষ্টি প্ৰদৰ্শন কৰিব।
ডু ইট য়ৰছেলেফ (Do-it-yourselves) আৰু চেলেঞ্জিং এক্টিভিটী (Challenging activity) শিতানত বিদ্যালয়ৰ ছাত্ৰ-ছাত্ৰীসকলে অংশগ্ৰহণ কৰিব।
সৰ্বশ্ৰেষ্ঠ উদ্ভাৱকক দীননাথ পাণ্ডে স্মাৰ্ট আইডিয়া ইন্নোভেশ্যন এৱাৰ্ড, ২০১৯ প্ৰদান কৰা হ’ব। এই বঁটাৰ সৈতে ১০,০০০ টকা প্ৰাইজমানি প্ৰদান কৰা হ’ব। দূৰণিবটীয়া অংশগ্ৰহণকাৰীসকলক থকা-খোৱা, আহা-যোৱাৰ সকলো খৰছ বহন কৰিব আঞ্চলিক বিজ্ঞান কেন্দ্ৰই।
