অৱশেষত সকলোৱে আশংকা কৰা ঘটনাটোৱেই ঘটালে ৰাছিয়াই।
যুদ্ধোন্মাদ পুটিনে যোৱা নিশা ইউক্ৰেইনৰ বিৰুদ্ধে যুদ্ধ ঘোষণা কৰাৰ পিছতে ৰাছিয়াৰ সেনাই আকাশমাৰ্গৰ পৰা ইউক্ৰেইনত আৰম্ভ কৰিছে ধাৰাসাৰ বোমাবৰ্ষণ।
ইউক্ৰেইনৰ সেনাক অনতিবিলম্বে আত্মসমৰ্পন কৰিবলৈ সকিয়নি দিছে ৰাছিয়াই। যুদ্ধংদেহী ৰাছিয়াৰ বিৰুদ্ধে আমেৰিকাই তীব্ৰ ক্ষোভ ব্যক্ত কৰি ইউক্ৰেইন আক্ৰমণৰ মূল্য মস্কোই ভৰিবই লাগিব বুলি সাৱধানবাণী শুনাইছে। আমেৰিকাৰ ৰাষ্ট্ৰপতি জো বিদেনে যিকোনো মুহূৰ্তত ৰাছিয়া আক্ৰমণৰ ইংগিতো দিছে।
ইপিনে ৰাছিয়াৰ আক্ৰমণৰ পিছতে ইউক্ৰেইনত বন্ধ কৰি দিয়া হৈছে দেশ খনৰ সকলো বিমান বন্দৰ। ফলত দেশ খনত আৱদ্ধ হৈ পৰিছে বহু ভাৰতীয় ছাত্ৰ-ছাত্ৰী।প্ৰায় ২০ হাজাৰ ভাৰতীয় লোক ইউক্ৰেইনত আৱদ্ধ হৈ আছে। অসমৰো বহু ছাত্ৰী-ছাত্ৰী দেশ খনত আৱদ্ধ হৈ আছে যদিও তেওঁলোক কুশলে থকা বুলি জানিব পৰা গৈছে।
আজি পুৱা ইউক্ৰেইনৰ পৰা আহি শতাধিক ভাৰতীয় লোক নতুন দিল্লীৰ বিমান বন্দৰত উপস্থিত হৈছে।
আজি ভাৰতলৈ ঘূৰি অহাসকলৰ ভিতৰত অসমৰো কেইবাগৰাকী ছাত্ৰ-ছাত্ৰী আছে। ৰাষ্ট্ৰসংঘৰ নিৰাপত্তা পৰিষদে ইউক্ৰেইনৰ শেহতীয়া পৰিস্থিতিকলৈ গভীৰ উদ্বেগ ব্যক্ত কৰাৰ লগতে আজি এখন জৰুৰী বৈঠক আহ্বান কৰিছে।
উল্লেখ্য ইউক্ৰেইনৰ প্ৰতি ৰাছিয়াই গ্ৰহণ কৰা পদক্ষেপৰ বাবেই পশ্চিমীয়া বহু দেশে ৰাছিয়াৰ বিৰুদ্ধে নিষেধাজ্ঞা আৰোপ কৰিছে।
ইউক্ৰেইনৰ সীমান্তত প্ৰায় ২ লাখ সৈন্য ৰাছিয়াই মোতায়েন কৰাৰ তথ্য কালিয়েই পোহৰলৈ আহিছিল।
ৰাছিয়াৰ ৰাষ্ট্ৰপতি পুটিনে ইউক্ৰেইন আক্ৰমণ কৰিবলৈ নিৰ্দেশ দিয়াৰ পিছতে বিশ্বৰ বিভিন্ন দেশে ৰাছিয়াৰ কাৰ্যক গৰিহণা দিয়াৰ লগতে ৰাছিয়াক সকলো ক্ষেত্ৰতে বয়কট কৰাৰ হুংকাৰ দিছে।
পুটিনৰ নিৰ্দেশৰ প্ৰায় ৩০ মিনিটৰ ভিতৰতে কিয়েভত ৰকেট আক্ৰমণ আৰম্ভ কৰে ৰাছিয়াৰ সেনাই।
ইউক্ৰেইনৰ পূব অংশত অৱস্থিত চহৰ মাৰিয়পোলত বিস্ফোৰণৰ ফলত বহু ভৱন তাচপাতৰ ঘৰৰ দৰে খহি পৰা দেখা গৈছে।
ইউক্ৰেইনে নাটোৰ পৰা উন্নত টেংক বিৰোধী অস্ত্ৰ আৰু কিছুসংখ্যক ড্ৰোন লাভ কৰিছে।
সেই অস্ত্ৰৰ বলেৰেই দেশ খনে মহা শক্তিমান ৰাছিয়াৰ বিৰুদ্ধে প্ৰাণপণে প্ৰতিৰোধ অব্যাহত ৰাখিছে। ইউক্ৰেইনত নাটো বাহিনীয় প্ৰত্যক্ষ ভাবে ৰাছিয়াৰ বিৰুদ্ধে যুঁজত নমা নাই যদিও হয়তো শীঘ্ৰে বাহিনীটোৱে যুদ্ধক্ষেত্ৰত জঁপিয়াই পৰিব পাৰে।
