ইউক্ৰেইনৰ ড্ৰ’ন আক্ৰমণৰ প্ৰতিশোধ ল’লে ৰাছিয়াই। শুকুৰবাৰে নিশা পুটিনৰ বাহিনীয়ে ইউক্ৰেইনৰ কেইবাখনো চহৰত ড্ৰ’ন আৰু মিছাইল আক্ৰমণ চলায়। খবৰ অনুসৰি ৰাছিয়াৰ সেনাই ইউক্ৰেইনৰ ৯টা অঞ্চলত ৪০০ৰো অধিক ড্ৰ’ন আৰু কমেও ৪০টা মিছাইলেৰে আক্ৰমণ চলাইছিল। এই আক্ৰমণত কমেও ৬ জন লোকৰ মৃত্যু হোৱাৰ খবৰ পোৱা গৈছে। প্ৰায় ৮০ জন লোক আহত হৈছে।
শুকুৰবাৰে নিশাৰ পৰা ইউক্ৰেইনৰ বিভিন্ন ঠাইত ৰাছিয়াৰ ড্ৰ’ন জাকে জাকে উৰি আহে। হঠাতে নিক্ষেপ কৰা হৈছে বিভিন্ন ধৰণৰ ক্ষেপণাস্ত্ৰ। ইয়াৰ ফলত ইউক্ৰেইনৰ ৰাজ্যিক জৰুৰীকালীন সেৱাই ব্যাপক ক্ষতিৰ বাতৰি প্ৰকাশ কৰিছে। তেওঁলোকে কয় যে এই আক্ৰমণত কিয়েভৰ তিনিজন অগ্নিনিৰ্বাপক বাহিনী, চেৰ্নিহিভত এজন আৰু লুটস্কৰ দুজন নাগৰিক নিহত হৈছে।
ৰাছিয়াই প্ৰেৰণ কৰা আক্ৰমণাত্মক ড্ৰ’নে কেইবাটাও ওখ অট্টালিকাত আঘাত হানে। ইউক্ৰেইনৰ ৰাষ্ট্ৰপতি ভ’ল’ডিমাইৰ জেলেনস্কিয়ে ৰাছিয়াৰ এই আক্ৰমণক তিনি বছৰীয়া যুদ্ধৰ আটাইতকৈ ভয়ংকৰ আক্ৰমণ বুলি অভিহিত কৰিছে।
এই আক্ৰমণৰ সন্দৰ্ভত ইউক্ৰেইনৰ বায়ুসেনাই কয় যে ৰাছিয়াই ৪০৭টা ড্ৰ’ন, ৬টা বেলিষ্টিক মিছাইল, ৩৮টাতকৈ অধিক ক্ৰুজ মিছাইল আৰু এটা এণ্টি ৰাডাৰ মিছাইলেৰে আক্ৰমণ কৰে। ইউক্ৰেইনৰ বায়ুসেনাইও ৪৫২টা আক্ৰমণৰ ভিতৰত ৪০৬টা আক্ৰমণক বাধা দিয়াৰ দাবী কৰে।
চলিত সপ্তাহতে ইউক্ৰেইনেও এশৰো অধিক ড্ৰ’নেৰে ৰাছিয়াক আক্ৰমণ কৰিছিল। সেই আক্ৰমণত ৰাছিয়াৰ কেইবাটাও সামৰিক ঘাটিৰ ক্ষতিৰ ছবি পোহৰলৈ আহিছিল। ইউক্ৰেইনে ৰাছিয়া আৰু ক্ৰিমিয়া সংযোগী দলংখনতো বিস্ফোৰণ বাতৰি ঘটায়। ইয়াৰ পূৰ্বে ৰাছিয়াই এই আক্ৰমণৰ প্ৰত্যুত্তৰ জনাব বুলি ঘোষণা কৰিছিল। ৰাছিয়াৰ ৰাষ্ট্ৰপতি ভ্লাদিমিৰ পুটিনেও আমেৰিকাৰ ৰাষ্ট্ৰপতি ড’নাল্ড ট্ৰাম্পৰ সৈতে হোৱা ফোন কলৰ সময়ত প্ৰত্যাক্ৰমণৰ কথা ঘোষণা কৰে। ইউক্ৰেইনৰ জনসাধাৰণে সেই আক্ৰমণৰ সাক্ষী হ’বলগীয়া হ’ল।
