কিছুদিন পূৰ্বে ইউক্ৰেইনে এক আচৰিত পদক্ষেপ লৈ ৰাছিয়াত ভয়ংকৰ আক্ৰমণ চলাইছিল। ধ্বংস হয় ৪০ খনতকৈও অধিক ৰাছিয়াৰ যুদ্ধ বিমান। তেতিয়াৰ পৰাই ৰাছিয়াৰ সেনাই ভ’ল’ডিমাইৰ জেলেনস্কিৰ দেশত আক্ৰমণ তীব্ৰতৰ কৰি তুলিছে। এইবাৰ প্ৰতিশোধ ল’বলৈ ৰাছিয়াই একে নিশাৰ ভিতৰতে ইউক্ৰেইনক আক্ৰমণ কৰিলে! ৪৭৯খন ড্ৰোন আৰু ২০টা ক্ষেপণাস্ত্ৰই বিভিন্ন চহৰক লক্ষ্য কৰি লৈছিল বুলি দাবী কৰিছে ইউক্ৰেইনে।
যোৱা মাহত ইস্তানবুলত ৰাছিয়া আৰু ইউক্ৰেইনৰ মাজত প্ৰথম ৰাউণ্ডৰ শান্তি আলোচনা অনুষ্ঠিত হৈছিল। যদিও ইয়াৰ ফলাফল আছিল শূন্য। ইফালে ইউক্ৰেইনে ১ জুনত আকস্মিক আক্ৰমণ চলাই শক্তিশালী ৰাছিয়াক কঁপাই তুলিছিল। জেলেনস্কিৰ দেশখনে বায়ুসেনাৰ ঘাটিটোক লক্ষ্য কৰি ‘অপাৰেচন স্পাইডাৰ ৱেব’ আৰম্ভ কৰিছিল। যাক মকৰাজালৰ লগত তুলনা কৰা হয়। ৰাছিয়াৰ বোমাৰু বিমান Tu-95, Tu22M3 আৰু এখন A-50 বিমান ধ্বংস হয়। তেতিয়াৰ পৰাই খঙত উতলিবলৈ ধৰিছে মস্কো।
জানিব পৰা মতে গোটেই সোমবাৰৰ নিশা ৰাছিয়াৰ সেনাই ইউক্ৰেইনৰ কেইবাখনো চহৰত গুলীচালনা কৰে। কিন্তু ইউক্ৰেইনৰ প্ৰতিৰক্ষা মন্ত্ৰালয়ে এক বিবৃতিত দাবী কৰিছে যে ৪৭৯খন ৰাছিয়াৰ ড্ৰ’নৰ ভিতৰত ৪৬০খন আৰু ২০টা ক্ষেপণাস্ত্ৰৰ ভিতৰত ১৯টা ধ্বংস হৈছে। ফলত ৰাছিয়াই যুদ্ধবিৰতিৰ পৰা কেইখোজমান পিছুৱাই গৈছে।
প্ৰসংগক্ৰমে যোৱা সপ্তাহত ইউক্ৰেইনৰ আক্ৰমণৰ পিছতো দুয়োখন দেশৰ প্ৰতিনিধিয়ে ইস্তানবুলত আলোচনাত মিলিত হৈছিল। ক্ৰেমলিনৰ হৈ ভ্লাদিমিৰ মেডিনস্কিয়ে কয় যে, প্ৰথমে আমি ৬ হাজাৰ ইউক্ৰেইনৰ সৈনিক আৰু বিষয়াৰ মৃতদেহ ঘূৰাই দিব। অহা সপ্তাহত এই মৃতদেহসমূহ ইউক্ৰেইনক গতাই দিম। ৰায়টাৰৰ তথ্য মতে, চুক্তি অনুসৰি ৰাছিয়াৰ সেনাই ১২১২ জন ইউক্ৰেইনৰ সৈনিকৰ মৃতদেহ সীমান্তলৈ লৈ আহিছিল। কিন্তু কিয়েভে তেওঁলোকক ঘূৰাই ল’বলৈ অস্বীকাৰ কৰিছে। আনকি কোনো কাৰাবন্দীকো মুকলি কৰি দিয়া নাই। ফলত এই যুদ্ধ কেতিয়া শেষ হ’ব তাৰ অন্ত সেয়া এতিয়ও অনিশ্চায়তাত।
