শেহতীয়াকৈ ইউক্ৰেইনৰ বায়ুসেনাই প্ৰকাশ কৰা অনুসৰি ৰাছিয়াই তেওঁলোকৰ দেশত কমেও ১৪টা বেলিষ্টিক মিছাইল নিক্ষেপ কৰাৰ লগতে ২৫০টা ড্ৰ’ন আক্ৰমণো কৰিছিল বুলি সদৰী কৰিছে।
ৰাছিয়াৰ সামৰিক আক্ৰমণৰ ফলত ধাৰাসায়ী ইউক্ৰেইনৰ ৰাজধানী কিয়েভ চহৰ। বিগত ২৪ ঘন্টাত সমগ্ৰ দেশত কমেও ১৩ জন লোকৰ মৃত্যু হৈছে। সেই সংখ্যা আৰু বৃদ্ধি পাব পাৰে বুলি আশংকা কৰা হৈছে। দুয়োখন দেশৰ মাজত বন্দী বিনিময় অব্যাহত আছে। এনে পৰিস্থিতিত ৰাছিয়াৰ সামৰিক আক্ৰমণক লৈ প্ৰশ্ন উত্থাপন হৈছিল।
ইউক্ৰেইনৰ বায়ুসেনাই প্ৰকাশ কৰা অনুসৰি ৰাছিয়াই তেওঁলোকৰ দেশত কমেও ১৪টা বেলিষ্টিক মিছাইল নিক্ষেপ কৰিছে। কেৱল সেয়াই নহয়, ২৫০টা ড্ৰ’ন আক্ৰমণো সংঘটিত কৰিছে। আক্ৰমণত বুহু এলেকা ধ্বংশ প্ৰাপ্ত হোৱাৰ লগতে হতাহতিৰ সংখ্যা এশ অতিক্ৰম কৰিছে বুলি জানিব পৰা গৈছে।
ইউক্ৰেইনৰ আৰক্ষীয়ে জনোৱা মতে, শুকুৰবাৰে নিশা কেৱল কিয়েভত ৰাছিয়াৰ আক্ৰমণত ১৮ জন লোক আহত হয়। এই আক্ৰমণৰ ফলত কেইবাটাও ওখ অট্টালিকাত অগ্নিকাণ্ড সংঘটিত হয়।
উল্লেখ্য যে ২০২২ চনৰ ২৪ ফেব্ৰুৱাৰীত ইউক্ৰেইন আৰু ৰাছিয়াৰ মাজত যুদ্ধ আৰম্ভ হৈছিল।যুদ্ধ আৰম্ভ হোৱাৰ তিনি বছৰৰ পাছত যোৱা সপ্তাহত প্ৰথমবাৰৰ বাবে দুয়োপক্ষই মধ্যস্থতাকাৰী অবিহনে মুখামুখি আলোচনাত মিলিত হৈছিল। যদিও তুৰস্কৰ ইস্তানবুলত অনুষ্ঠিত হোৱা সেই বৈঠকত যুদ্ধবিৰতিৰ কোনো সিদ্ধান্ত লোৱা হোৱা নাছিল, তথাপিও দুয়োপক্ষই পৰ্যায়ক্ৰমে ১০০০ যুদ্ধবন্দীক বিনিময় কৰাৰ সিদ্ধান্ত লৈছিল। ৰাছিয়া আৰু ইউক্ৰেইনে এই কথা মানি লৈ যুদ্ধবন্দী বিনিময়ৰ প্ৰক্ৰিয়া আৰম্ভ কৰিছে। শুকুৰবাৰৰ পিছত শনিবাৰেও দুয়োখন দেশৰ মাজত বন্দীৰ আদান-প্ৰদান হয়। ইতিমধ্যে ৰাছিয়া আৰু ইউক্ৰেইনৰ মাজত ৬০০ৰো অধিক কয়দীৰ আদান-প্ৰদান কৰা হৈছে বুলি জানিব পৰা গৈছে।
