মস্কোৱে নিশ্চিত কৰিছে যে ৰাছিয়াৰ ভাড়াতীয়া সেনাবাহিনীৰ মুৰব্বী য়েভগেনি প্ৰিগোজিনৰ বিমান দুৰ্ঘটনাত মৃত্যু হৈছে। ৰাছিয়াৰ এটা বিশেষ তদন্তকাৰী দলে দেওবাৰে এক প্ৰতিবেদনত এই তথ্য সদৰী কৰে।
তদন্ত কমিটিৰ মুখ্য মুখপাত্ৰ স্বেটলানা পেট্ৰেংকোৱে কয় যে ৰাছিয়াৰ তদন্তকাৰীয়ে মৃতদেহবোৰৰ ডি এন এ পৰীক্ষা কৰিছে। তিভাৰ অঞ্চলত বিমানখন দুৰ্ঘটনাগ্ৰস্ত হয়। মস্কোৰ পৰা চেণ্ট পিটাৰ্ছবাৰ্গলৈ গৈ আছিল বিমানখন। বিমানখনত থকা ১০ জন যাত্ৰীৰ সকলোকে চিনাক্ত কৰা হৈছে।
উল্লেখ্য যে যোৱা ২৩ আগষ্টত মস্কোৰ পৰা চেণ্ট পিটাৰ্ছবাৰ্গলৈ যোৱাৰ পথত প্ৰিগোজিন থকা বিমানখন দুৰ্ঘটনাগ্ৰস্ত হয়। বিমানখনত মুঠ ১০ জন লোক আছিল, য’ত আছিল তিনিজন ক্ৰু, প্ৰিগ’জিন আৰু ৱেগনাৰৰ অন্যান্য উচ্চ পদস্থ বিষয়া।
দুৰ্ঘটনাটোত আটাইকেইজনৰ থিতাতে মৃত্যু হয়। আনকি নিহত সকলো মৃতদেহ ছিন্নভিন্ন হৈ চিনিব নোৱাৰা হৈ পৰিছিল। সেয়ে, পিছত মৃতদেহবোৰৰ পৰিচয় নিশ্চিত কৰিবলৈ জিনীয় বিশ্লেষণ (ডিএনএ টেষ্ট) কৰা হয়।
