শুল্ক যুদ্ধত সংঘাতৰ শিখৰত উপনীত হৈছে আমেৰিকা-ৰাছিয়া। ৰাছিয়াৰ পৰা তেল ক্ৰয় কৰাৰ অভিযোগত কেইবাখনো দেশৰ লগতে ভাৰতৰ ওপৰত বৃহৎ নতুন শুল্ক আৰোপ কৰাৰ হুংকাৰ দিছে আমেৰিকাৰ ৰাষ্ট্ৰপতি ড’নাল্ড ট্ৰাম্পে। এনে পৰিস্থিতিত প্ৰতিক্ৰিয়া প্ৰকাশ কৰিছে মস্কোৱে।
ৰাছিয়াৰ বৈদেশিক মন্ত্ৰালয়ে কয় যে আমেৰিকাই নিজৰ আধিপত্য বৃদ্ধিৰ ক্ষেত্ৰত ‘নব্য উপনিবেশিকতাবাদ’ৰ নীতি অনুসৰণ কৰিবলৈ আৰম্ভ কৰিছে। ৰাছিয়াই দাবী কৰিছে যে কোনো শুল্ক যুদ্ধ বা নিষেধাজ্ঞাই বন্ধুত্বপূৰ্ণ দেশৰ সৈতে সম্পৰ্কৰ ইতিহাস সলনি কৰিব নোৱাৰে। ট্ৰাম্পৰ এই ভাবুকি একমুখে খাৰিজ কৰিছে মস্কোৱে।
সোমবাৰে ৰাছিয়াৰ বৈদেশিক মন্ত্ৰালয়ৰ মুখপাত্ৰ মাৰিয়া জাখাৰোভাই কয় যে, “তেওঁলোকে (আমেৰিকাই) নিজৰ আধিপত্য বজাই ৰাখিবলৈ নব্য ঔপনিৱেশিকতাবাদৰ নীতি গ্ৰহণ কৰিছে। তেওঁলোকে নিজৰ ৰাজনৈতিক এজেণ্ডাক সমৰ্থন নকৰাসকলৰ ওপৰত অৰ্থনৈতিক হেঁচা সৃষ্টি কৰাৰ কৌশল গ্ৰহণ কৰিছে।”
ৰাছিয়াৰ বন্ধুত্বপূৰ্ণ দেশসমূহৰ ওপৰত অতিৰিক্ত শুল্ক আৰোপ কৰাৰ সন্দৰ্ভত মাৰিয়াৰ মন্তব্য ‘প্ৰত্যক্ষভাৱে দখলৰ প্ৰয়াস’, ৰাষ্ট্ৰসমূহৰ সাৰ্বভৌমত্ব আৰু “তেওঁলোকৰ আভ্যন্তৰীণ বিষয়ত হস্তক্ষেপ কৰাৰ প্ৰয়াস”। তাৰ পিছতে ৰাছিয়াই দাবী কৰে যে কোনো শুল্ক যুদ্ধ বা নিষেধাজ্ঞাই বন্ধুত্বপূৰ্ণ দেশৰ সৈতে সম্পৰ্কৰ ইতিহাস সলনি কৰিব নোৱাৰে।
ইপিনে, আমেৰিকাৰ এই ভাবুকিৰ পিছত নতুন দিল্লীয়ে এক কঠোৰ বিবৃতি প্ৰকাশ কৰিছে। বৈদেশিক পৰিক্ৰমা মন্ত্ৰালয়ে কয়, ‘ইউক্ৰেইনত ৰাছিয়াৰ সৈতে যুদ্ধ আৰম্ভ হোৱাৰ পিছত বেছিভাগ সামগ্ৰী ইউৰোপৰ ফালে নিৰ্দেশিত হৈছিল। সেইবাবেই ভাৰতে ৰাছিয়াৰ পৰা তেল ক্ৰয় কৰিবলৈ আৰম্ভ কৰিলে। কেৱল সেয়াই নহয়, সেই সময়ত আমেৰিকাই ভাৰতক বিশ্বৰ শক্তিৰ বজাৰখন সুস্থিৰ কৰি ৰাখিবলৈ ৰাছিয়াৰ পৰা তেল ক্ৰয় কৰিবলৈ উৎসাহিত কৰিছিল।’ আমেৰিকা আৰু ইউৰোপীয় ইউনিয়নে ভাৰতক অহৰহ আক্ৰমণ কৰা ধৰণকো ভাৰতে ‘অযুক্তিকৰ’ বুলি অভিহিত কৰিছে।
উল্লেখ্য যে যোৱা বুধবাৰে মাৰ্কিন ৰাষ্ট্ৰপতিয়ে ভাৰতৰ ওপৰত ২৫ শতাংশ শুল্ক আৰোপ কৰিছিল। তেওঁ স্পষ্টকৈ কয় যে তেওঁলোক ভাৰতৰ বন্ধু হ’লেও তেওঁলোকৰ ওপৰত শুল্ক আৰোপ কৰা হৈছে। এই নতুন শুল্ক ১ আগষ্টৰ পৰা কাৰ্যকৰী হ’ব।
তেওঁ লগতে কয় যে ভাৰতে ৰাছিয়াৰ পৰা বৃহৎ পৰিমাণৰ তেল আৰু অস্ত্ৰ-শস্ত্ৰ ক্ৰয় কৰে। সেইবাবেই ভাৰতৰ ওপৰত ২৫ শতাংশ শুল্ক আৰোপ কৰা হৈছে।
