মধ্য ইউক্ৰেইনত প্ৰৱেশ কৰিছে ৰাছিয়াৰ সেনা! দেওবাৰে এই কথা দাবী কৰিছে ক্ৰেমলিনে। তিনি বছৰীয়া ৰাছিয়া-ইউক্ৰেইন যুদ্ধত ৰাছিয়াৰ সৈন্যই প্ৰথমবাৰৰ বাবে ইউক্ৰেইনৰ কেন্দ্ৰত উপস্থিত হৈছে।
পূব ইউক্ৰেইনত ডনবাছ (ডনেটস্ক আৰু লুহানস্ক অঞ্চলক সামূহিকভাৱে এই নামেৰে কোৱা হয়) আচলতে ইউক্ৰেইনৰ এটা অংশ য’ত ইয়াৰ বাসিন্দাসকলৰ অধিকাংশই জাতিগতভাৱে ৰাছিয়ান। তেওঁলোকে গঠন কৰা মিলিচীয়া গোটবোৰে তাত মস্কোৰ বাবে সক্ৰিয়ভাৱে যুঁজি আছে।
ইতিমধ্যে ৰাছিয়াৰ সৈন্যই ডনেটস্ক অঞ্চলৰ এক বৃহৎ অংশ দখল কৰি লৈছিল। এইবাৰ ৰাছিয়াৰ প্ৰতিৰক্ষা মন্ত্ৰালয়ে দাবী কৰিছে যে ৰাছিয়াৰ সেনাৰ ৯০ নং টেংক ডিভিজনে ডনেটস্কৰ গাতে লাগি থকা ডনিপ্ৰ’ চহৰৰ সীমান্তত উপনীত হৈছে। তেওঁলোকে দাবী কৰে যে ড্নিপ্ৰ’ চহৰৰ সীমান্তৰ পৰা ৰাছিয়াৰ সৈন্যই আৰু অধিক ভিতৰুৱা অঞ্চলত প্ৰৱেশ কৰিবলৈ আৰম্ভ কৰিছে।
দৰাচলতে যোৱা কেইমাহমানৰ পৰা ৰাছিয়াৰ বাহিনীয়ে মধ্য ইউক্ৰেইনৰ ডিনিপ্ৰ’ত প্ৰৱেশৰ চেষ্টা চলাই আহিছে। এইবাৰ ৰাছিয়াই দাবী কৰিছে যে তেওঁলোকে প্ৰথমবাৰৰ বাবে মধ্য ইউক্ৰেইনৰ ড্নিপ্ৰ’ অঞ্চলত প্ৰৱেশ কৰিছে।
অৱশ্যে ক্ৰেমলিনে এতিয়াও দাবী কৰা নাই যে তেওঁলোকে চহৰখন দখল কৰিছে। অনুমান কৰা হৈছে যে যদি ৰাছিয়াৰ সেনাই ড্নিপ্ৰ’ চহৰৰ নিয়ন্ত্ৰণ লয় তেন্তে ই ইউক্ৰেইনৰ সেনাৰ বাবে নতুন সমস্যাৰ সৃষ্টি কৰিব পাৰে।
শেহতীয়াকৈ ৰাছিয়াৰ ৰাষ্ট্ৰপতি ভ্লাদিমিৰ পুটিনৰ সেনাই ডনবাছ অঞ্চলত সক্ৰিয় মস্কো সমৰ্থক মিলিচীয়া গোটৰ সহায়ত ইউক্ৰেইনৰ সেনাৰ স্থানত স্থলপথেৰে বাৰে বাৰে আক্ৰমণ চলাইছে। তদুপৰি ড্ৰোন আৰু মিছাইল আক্ৰমণো অব্যাহত আছে। এই পৰিস্থিতিত যদি মধ্য ইউক্ৰেইনৰ ডিনিপ্ৰ’ ৰাছিয়াৰ বাহিনীৰ হাতত পৰে তেন্তে ই ক্ৰেমলিনক কৌশলগতভাৱে সহায় কৰিব পাৰে।
এসপ্তাহ পূৰ্বে ইউক্ৰেইনে যোৱা দেওবাৰে ৰাছিয়াত ড্ৰ’ন আক্ৰমণ চলাইছিল। সেইটোৱেই আছিল ইউক্ৰেইনৰ যুদ্ধৰ যোৱা তিনি বছৰৰ ভিতৰত ৰাছিয়াৰ ওপৰত কৰা আটাইতকৈ ডাঙৰ আক্ৰমণ। ইউক্ৰেইনৰ ড্ৰ’নে ৰাছিয়াৰ কেইবাটাও বিমান ঘাটিত বোমাৰু বিমানক আক্ৰমণ কৰে।
বিভিন্ন সূত্ৰৰ মতে, এই আক্ৰমণত ৪০ খনতকৈও অধিক ৰাছিয়াৰ যুদ্ধ বিমান ক্ষতিগ্ৰস্ত হৈছে। ইউক্ৰেইনে ড্ৰোন আক্ৰমণত ১১খন ৰাছিয়াৰ বিমান ধ্বংস কৰা বুলি দাবী কৰিছে। এই ঘটনাৰ পিছত ক্ৰেমলিনেও কয় যে ৰাছিয়াৰ সেনাই সঠিক সময়ত প্ৰতিক্ৰিয়া প্ৰকাশ কৰিব।
ইয়াৰ পিছতে যোৱা দুদিনত ইউক্ৰেইনৰ দুখন গুৰুত্বপূৰ্ণ চহৰত ৰাছিয়াৰ বাহিনীয়ে আক্ৰমণ চলাইছে। শুকুৰবাৰে ৰাছিয়াৰ সেনাই ইউক্ৰেইনৰ ৰাজধানী কিয়েভত ড্ৰ’ন আক্ৰমণ চলায়। শনিবাৰে ইউক্ৰেইনৰ আন এখন গুৰুত্বপূৰ্ণ চহৰ খাৰকিভত সংঘটিত হয় এই আক্ৰমণ।
