চলিত ৰাছিয়া-ইউক্ৰেইন যুদ্ধই ইতিমধ্যে তিনিমাহ অতিক্ৰম কৰিলে। যুদ্ধবিদ্ধস্ত ইউক্ৰেইনত এতিয়া কেৱল গুলী-বাৰুদৰ ৰক্তক্ষয়ী দাবানল। শক্তিশালী ৰুছ সৈন্যৰ বিৰুদ্ধে প্ৰাণপণ যুঁজত অৱতীৰ্ণ হৈছে ইউক্ৰেইনৰ সেনাবাহিনী।
সাহসিকতাৰ পৰিচয় দি ইউক্ৰেইন বাহিনীয়ে কেইবাখনো চহৰত ৰুছ সৈন্যক শলঠেকতো পেলাইছে। অৱশ্যে এই বিপৰ্যয়ৰ মাজতো ৰাছিয়ান সৈন্যবাহিনীয়ে দখল কৰিছে ইউক্ৰেইনৰ কেইবাখনো গুৰুত্বপূৰ্ণ চহৰ।
যুদ্ধৰ এনে ভয়াৱহ দাবানলৰ মাজতে যুদ্ধ অপৰাধৰ বিচাৰত এজন ৰাছিয়ান সৈনিকক যাৱজ্জীৱন কাৰাদণ্ডৰে দণ্ডিত কৰিছে ইউক্ৰেইনৰ আদালতে।
চাৰ্জেন্ট ভাদিম শিশিমাৰিন (২১) নামৰ এই সেনা জোৱানজনৰ বিৰুদ্ধে উত্তৰ-পূব চুমি অঞ্চলৰ এখন গাঁৱত ইউক্ৰেইনৰ এজন সাধাৰণ নাগৰিকক মূৰত গুলী মাৰি হত্যা কৰাৰ অভিযোগ উত্থাপিত হৈছিল।
আদালতৰ সন্মুখত ৰুছ সৈনিকজনে নিজৰ দোষ স্বীকাৰ কৰে আৰু উৰ্ধতন বিষয়াৰ আদেশ অনুসৰণ কৰি এই কাৰ্য সম্পাদন কৰে বুলি সাক্ষ্য প্ৰদান কৰে।
শিশিমাৰিনে আদালতৰ সন্মুখত দিয়া ভাষ্য অনুসৰি তেওঁ হত্যা কৰা ইউক্ৰেইনৰ অসামৰিক ব্যক্তিজনে নিজৰ মোবাইল ফোনত কথা পাতি আছিল। কিন্তু ৰুছ সেনাৰ উৰ্ধতন বিষয়াজনে উক্ত ইউক্ৰনীয়ান ব্যক্তিজনে ৰুছ সেনাৰ অৱস্থান সম্পৰ্কে ইউক্ৰেইনৰ সেনাক প্ৰকাশ কৰিব পাৰে বুলি সন্দেহ প্ৰকাশ কৰে।
এই সন্দেহৰ আধাৰতে বিষয়াজনে ইউক্ৰেইনৰ অসামৰিক ব্যক্তিগৰাকীক হত্যা কৰিবলৈ শিশিমাৰিনক নিৰ্দেশ দিয়ে।
ৰাছিয়াৰ ইউক্ৰেইন আক্ৰমণৰ চাৰিদিন পাছতেই এই ঘটনা সংঘটিত হৈছিল বুলি জানিব পৰা গৈছে। অভিযুক্ত ৰুছ সেনাজনৰ সাক্ষ্য গ্ৰহণৰ পাছতে আদালতে তেওঁক দোষী সাব্যস্ত কৰে আৰু আজীৱন কাৰাদণ্ডৰ শাস্তি প্ৰদান কৰে।
ৰাছিয়াৰ ইউক্ৰেইন আক্ৰমণত ইতিমধ্যে হাজাৰ হাজাৰ অসামৰিক ব্যক্তিৰ মৃত্যু হৈছে বুলি ইউক্ৰেইনে দাবী কৰি আহিছে। সম্প্ৰতি দেশখনত যুদ্ধ অপৰাধৰ এনে সম্ভাৱ্য বহু গোচৰৰ তদন্ত কৰি থকা হৈছে।
