আগন্তুক বাংলাদেশ প্ৰীমিয়াৰ লীগ টি-২০ৰ বিশেষ সংস্কৰণটো বিশেষ ৰূপ দিয়াৰ উদ্দেশ্যে উদ্বোধনী অনুষ্ঠানত অংশ ল’বলৈ আমণ্ট্ৰণ জনাইছে বলিউদৰ ছুপাৰষ্টাৰ ছালমান খান আৰু মোহময়ী অভিনেত্ৰী কেটৰিনা কাইফক।
জাতিৰ পিতা বংগবন্ধু চেইখ মুজিবুৰ ৰহমানৰ জন্ম শতবাৰ্ষিকী হিচাপে বাংলাদেশ ক্ৰিকেট ব’ৰ্ডে পূৰ্বৰ সংস্কৰণ সমূহৰ তুলনাত বি পি এলৰ আগন্তুক সংস্কৰণটো কিছু পৰিমানে ব্যতিক্ৰম ৰূপত আয়োজনৰ পৰিকল্পনা কৰিছে।
এই প্ৰসংগত বি পি এল পৰিচালনা পৰিষদৰ অন্তৱৰ্তীকালিন অধ্যক্ষ চেইখ চোহেলে কয়, ‘বলিউদৰ দুই তাৰকা ছালমান খান আৰু কেটৰিনা কাইফে চেৰ এ বাংলা নেশ্যনেল ষ্টেডিয়ামত অনুষ্ঠিত হ’ব লগীয়া বি পি এলৰ উদ্বোধনী অনুষ্ঠানত অংশ লোৱাৰ উদ্দেশ্যে ৮ ডিচেম্বৰত ধাকাত উপস্থিত হ’ব’।
‘ছালমান খান আৰু কেটৰিনা কাইফৰ উপস্থিতি নিশ্চিত হোৱাৰ লগতে বাংলাদেশৰ জনপ্ৰিয় কণ্ঠশিল্পী মমতাজেও অনুষ্ঠান পৰিৱেশন কৰিব। কেইগৰাকীমান আন্তঃৰাষ্ট্ৰীয় পৰ্যায়ৰ তাৰকাৰ অংশগ্ৰহণ সম্পৰ্কতো আলোচনা চলি আছে। তেওঁলোকৰ উপস্থিতি নিশ্চিত হ’লেই আমি নাম প্ৰকাশ কৰিম’। চোহেলে জানিবলৈ দিয়ে।
উল্লেখ্য যে প্ৰতিযোগিতাৰ লীগৰ মেচসমূহ ১১ ডিচেম্বৰৰ পৰা ২০২০ চনৰ ১১ জানুৱাৰিলৈকে চলিব। ফাইনেল মেচখন হ’ব ১৭ জানুৱাৰিত।
