চামগুৰিত কংগ্ৰেছী বিধায়ক ৰকিবুল হুছেইন আৰু নুৰুল হুদাৰ বাহনত বিজেপি কৰ্মীয়ে আক্ৰমণ কৰা ঘটনাক কেন্দ্ৰ কৰি আজি প্ৰদেশ কংগ্ৰেছৰ এটা সজাতি দলে আৰক্ষী সঞ্চালক প্ৰধান কুলধৰ শইকীয়াক সাক্ষাৎ কৰে।
প্ৰদেশ কংগ্ৰেছৰ সভাপতি ৰিপুন বৰাৰ নেতৃত্বত যোৱা দলটোৱে আৰক্ষী সঞ্চালক প্ৰধান কুলধৰ শইকীয়াক সাক্ষাৎ কৰি দোষীৰ বিৰুদ্ধে ব্যৱস্থা গ্ৰহণৰ বাবে আহ্বান জনায় স্মাৰক পত্ৰ প্ৰদান কৰে।
স্মাৰক পত্ৰ প্ৰদান কৰি প্ৰদেশ কংগ্ৰেছৰ সভাপতি ৰিপুন বৰাই কয় “চামগুৰিৰ বৰমাত বিজেপিৰ ১৩/১৪ জনীয়া এটা দলে বিধায়ক দুজনৰ কনভয় আগুচি ধৰি প্ৰাণে মাৰিবৰ চেষ্টা কৰিছিল। বিভিন্ন ধৰণৰ চোকা অস্ত্ৰৰে আক্ৰমণ কৰিছিল আৰু শিলগুটি মাৰি গাড়ীৰ গ্লাছ ভাঙি দিছিল। কথমপি আমাৰ বিধায়ক দুজন ৰক্ষা পৰিছিল। দলীয় কৰ্মী আৰু পি এছ অ’ আঘাতপ্ৰাপ্ত হৈছিল’।
ইয়াৰ উপৰি তেওঁ কয়, ‘চামগুৰিৰ থানাৰ অ’ চি উপস্থিত থকাৰ পাছতো আৰক্ষীয়ে নিৰৱ ভূমিকা পালন কৰিছে। বিজেপিৰ নিৰ্দেশত আৰক্ষী উঠা-বহা কৰিছে। ঘটনাৰ পাছত চামগুৰিৰ থানাত এজাহাৰ দাখিল কৰা হৈছে। ১৩ জনৰ নাম উল্লেখ কৰা হৈছে যদিও বৰ্তমানলৈকে আৰক্ষীয়ে ব্যৱস্থা গ্ৰহণ কৰা নাই। বিজেপিৰ কথাত যাতে আৰক্ষী উঠা-বহা নকৰে, নিৰপেক্ষতাৰে তেওঁলোকৰ দায়িত্ব পালন কৰে এই আহ্বান জনোৱা হৈছে আৰক্ষী সঞ্চালক প্ৰধানলৈ। বিজেপিয়ে কলিয়াবৰ আৰু নগাঁৱৰ পৰাজয়ৰ হতাশাত ভুগিছে। সেয়ে এনেকুৱা পন্থা গ্ৰহণ কৰিছে’।
আনহাতে ঘটনা সন্দৰ্ভত ৰকিবুল হুছেইনে কয় ‘মজিবুৰ ৰহমান বিজেপিৰ বুথ কমিটিৰ এগৰাকী সভাপতি। তেওঁ কেইদিনমান পূৰ্বে জেইলৰ পৰা ওলাই আহিছিল। তেওঁৰ নেতৃত্বতে কালিৰ ঘটনা সংঘটিত হৈছিল। তেওঁ এজন ডকাইত। আলফাৰ গুলীয়েও আমাক একো কৰিব পৰা নাছিল আৰু এতিয়া শিলগুটিয়ে আমাক কি কৰিব?’
এছ পি , এছ ডি পি অ’ৰ টেলিফোনিক কল ৰেকৰ্ড ল’বৰ বাবেও আৰক্ষী সঞ্চালক প্ৰধানক ৰকিবুল হুছেইনে আহ্বান জনায়।
বুধবাৰৰ ঘটনাৰ সৈতে চৰিফুল ইছলাম, হবিবুৰ ৰহমান, ৰছিদূৰ হক, চান মিয়া, মকবুল হক, সুৰহাৰ আলি, নুৰজামাল, মজিবুৰ ৰহমান, মফিজুল ইচলাম, আজিজুৰ ৰহমান, আব্দুল খালেক, উমৰ ফাৰুক আৰু জমিৰ উদ্দিন নামৰ বিজেপি কৰ্মী কেইজন জড়িত থকা বুলি জানিব পৰা গৈছে।
