আদি এলেঙী সত্ৰৰ সত্ৰাধিকাৰ তথা শিক্ষাবিদ কমল চন্দ্ৰ গোস্বামীয়ে আজি শেষ নিশ্বাস ত্যাগ কৰে। দীৰ্ঘদিন ধৰি বাৰ্ধক্যজনিত ৰোগত আক্ৰান্ত হৈ থকাৰ পিছত সত্ৰাধিকাৰ গৰাকীয়ে গুৱাহাটীৰ খানাপাৰাস্থিত নিজৰ বাসগৃহত পুৱতি নিশা শেষ নিশ্বাস ত্যাগ কৰে।
মৃত্যু সময়ত কমল চন্দ্ৰ গোস্বামীৰ বয়স আছিল ৯৬ বছৰ।
উল্লেখযোগ্য যে প্ৰয়াত সত্ৰাধিকাৰ গোস্বামী বৈদ্যুতিন মাধ্যম ডি ৱাই-৩৬৫ৰ মুখ্য সম্পাদক মনোজ কুমাৰ গোস্বামীৰ পিতৃ। ১৯২৩ চনত মাজুলীত জন্মগ্ৰহণ কৰা গোস্বামীয়ে নগাওঁ মহাবিদ্যালয়ৰ ভূগোল বিভাগৰ অধ্যাপক হিচাপে কাৰ্যনিৰ্বাহ কৰি ১৯৮৫ চনত মহাবিদ্যালয়খনৰ পৰা উপাধ্যক্ষৰূপে অৱসৰ গ্ৰহণ কৰিছিল। ইয়াৰ উপৰি তেওঁ নগাঁও গোপীনাথ দেৱ বাণিজ্য মহাবিদ্যালয়ৰ প্ৰতিষ্ঠাপক আছিল।
মৃত্যুৰ খবৰ পোৱাৰ পিছতে আত্মীয়-স্বজনৰ লগতে বহু গুণমুগ্ধ তেওঁৰ বাসগৃহত উপস্থিত হৈ কমল চন্দ্ৰ গোস্বামীলৈ শেষ শ্ৰদ্ধা জ্ঞাপন কৰাৰ লগতে শোকসন্তপ্ত পৰিয়াললৈ সমবেদনা জ্ঞাপন কৰে।
গোস্বামীৰ পৰিয়ালৰ লোকে জানিবলৈ দিয়া মতে আজি দুপৰীয়া ১ বজাত তেওঁৰ নশ্বৰ দেহ নৱগ্ৰহ স্মশানলৈ লৈ যোৱা হ’ব।
