মালয়ালম অভিনেতা জয়সূৰ্যৰ বিৰুদ্ধে আজি অৰ্থাৎ ৩০ আগষ্টত দ্বিতীয়টো গোচৰ ৰুজু কৰা হৈছে।ভাৰতীয় দণ্ডবিধিৰ ৩৫৪, ৩৫৪এ(এ১)(আই) আৰু ৩৫৪ডি ধাৰাত অভিযোগকাৰীৰ বক্তব্য লিপিবদ্ধ কৰাৰ পাছতে গোচৰ ৰুজু কৰা হৈছে।
এএনআইত প্ৰকাশিত এক প্ৰতিবেদন অনুসৰি কেৰালা আৰক্ষীয়ে কয়, “অভিনেতা জয়সূৰ্যৰ বিৰুদ্ধে ৩৫৪, ৩৫৪এ(এ১)(আই) ৩৫৪ডি আইপিচিৰ অধীনত দ্বিতীয় এফআইআৰ ৰুজু কৰা হৈছে। অভিযোগকাৰীৰ বক্তব্য লিপিবদ্ধ হোৱাৰ পাছত গোচৰ ৰুজু কৰা হৈছে।”
বিশেষ তদন্তকাৰী দলে কালি ২৯ আগষ্টত অভিযোগকাৰীৰ বক্তব্য লিপিবদ্ধ কৰিছিল।
মালয়ালম অভিনেতাজনৰ বিৰুদ্ধে দাখিল কৰা এইখন দ্বিতীয়খন এফআইআৰ। ইয়াৰ পূৰ্বে অভিনেতা মিনু মুনীৰে অভিনেতাজনৰ বিৰুদ্ধে এজাহাৰ দাখিল কৰিছিল আৰু ২৮ আগষ্টত এফআইআৰ ৰুজু হৈছিল।
ইয়াৰ পূৰ্বে মুনীৰে নিজৰ এই অধ্যায়ৰ কথা উল্লেখ কৰিছিল যদিও হেমা কমিটিৰ প্ৰতিবেদনৰ পাছত পুনৰ শ্বেয়াৰ কৰিছিল। জয়সূৰ্যৰ উপৰিও চিপিআই (এম)ৰ বিধায়ক তথা অভিনেতা মুকেশ, অভিনেতা এদাভেলা বাবুকে ধৰি আন ছয়জনৰ নাম উল্লেখ কৰিছিল।
ইফালে, অভিনেতা মোহনলালৰ নেতৃত্বত গঠিত আম্মাৰ সমগ্ৰ সংস্থাটোৱে হেমা কমিটীৰ প্ৰতিবেদন ৰাজহুৱা হোৱাৰ পাছত মঙলবাৰে পদত্যাগ কৰে। ৬৪ বছৰীয়া মোহনলালে নৈতিক দায়বদ্ধতাৰ কথা উল্লেখ কৰি পদ এৰি দিয়াৰ বিপৰীতে আন সদস্যসকলে যৌথ পদত্যাগ পত্ৰ দাখিল কৰে।
