ৱাকফ আইনৰ বিৰুদ্ধে প্ৰতিবাদৰ মাজতে কাছাৰ জিলাত ১৬৩ ধাৰা জাৰি
দেশৰ প্ৰান্তে প্ৰান্তে অব্যাহত আছে ৱাকফ আইনৰ বিৰুদ্ধে প্ৰতিবাদ। কাছাৰৰ জিলাত ৱাকফ আইনৰ বিৰুদ্ধে প্ৰতিবাদৰ ফলত শান্তি শৃংখলা ভংগ হোৱাৰ সম্ভাৱনা বৃদ্ধি পোৱাৰ বাবে জিলা দণ্ডাধীশে ভাৰতীয় নাগৰিক সুৰক্ষা সংহিতাৰ ১৬৩ ধাৰাৰ অধীনত সমগ্ৰ জিলাতে নিষেধাজ্ঞা আৰোপ কৰিছে ।
কাছাৰ আৰক্ষী অধীক্ষকৰ প্ৰতিবেদনৰ ভিত্তিত ১৩ এপ্ৰিলত জিলা দণ্ডাধীশ মৃদুল যাদৱএ জাৰি কৰা এক চৰকাৰী আদেশ অনুসৰি এই সিদ্ধান্ত লোৱা হৈছে।
নিৰ্দেশনা অনুসৰি অঞ্চলটোত জনসাধাৰণৰ সুৰক্ষা তথা শান্তি-শৃংখলা নিশ্চিত কৰিবলৈ তাৎক্ষণিক প্ৰতিৰোধমূলক ব্যৱস্থা গ্ৰহণ কৰাটো প্ৰয়োজনীয় বুলি উল্লেখ কৰিছে।
ৱাকফ আইনখনৰ বিৰুদ্ধে হোৱা প্ৰতিবাদত আৰু আইন-শৃংখলা বিঘিনিৰ সম্ভাৱনাৰ প্ৰতি লক্ষ্য ৰাখি পৰৱৰ্তী নিৰ্দেশ নোহোৱালৈকে সমগ্ৰ কাছাৰ জিলাত নিষেধাজ্ঞা আৰোপ কৰা হৈছে।
এই নিষেধাজ্ঞাৰ সময়ছোৱাত জনসাধাৰণক কৰ্তৃপক্ষক সহযোগ কৰিবলৈ প্ৰশাসনে আহ্বান জনাইছে। আৰু নিষেধাজ্ঞাৰ প্ৰকৃতি আৰু পৰিসৰ সম্পৰ্কে অধিক তথ্য জিলা কৰ্তৃপক্ষই জাৰি কৰাৰ সম্ভাৱনা আছে। শান্তি-শৃংখলা নিশ্চিত কৰিবলৈ জিলাখনত নিৰাপত্তা ব্যৱস্থা অধিক কটকটীয়া কৰা হৈছে।