প্ৰয়াত প্ৰাক্তন প্ৰধানমন্ত্ৰী মনমোহন সিঙৰ পত্নী গুৰশৰণ সিঙৰ নিৰাপত্তা হ্ৰাস কৰাৰ সিদ্ধান্ত নৰেন্দ্ৰ মোদী চৰকাৰৰ। অৱসৰৰ পাছত প্ৰাক্তন প্ৰধানমন্ত্ৰীগৰাকী আৰু তেওঁৰ পত্নীক ‘জেড প্লাছ’ নিৰাপত্তা প্ৰদান কৰা হৈছিল। এইবাৰ নিৰাপত্তা ব্যৱস্থা ‘জেড প্লাছ’ পৰা ‘জেড কেটেগৰী’লৈ হ্ৰাস কৰা হৈছে।
কেন্দ্ৰীয় গৃহ মন্ত্ৰালয়ৰ সূত্ৰ অনুসৰি গুৰশৰণৰ নিৰাপত্তাজনিত বিষয়সমূহ পৰ্যালোচনা কৰি এই সিদ্ধান্ত লোৱা হৈছে। কিন্তু কেন্দ্ৰৰ সিদ্ধান্তকলৈ বিভিন্ন মহলে প্ৰশ্ন উত্থাপন কৰিছে।
প্ৰাপ্ত খবৰ অনুসৰি কেন্দ্ৰীয় চোৰাংচোৱা সংস্থাৰ পৰা লাভ কৰা তথ্য বিশ্লেষণ কৰি কেন্দ্ৰই গুৰশৰণ সিঙৰ নিৰাপত্তা হ্ৰাস কৰাৰ সিদ্ধান্ত লৈছে। এতিয়াৰে পৰা চি আৰ পি এফ জোৱানসকলে তেওঁলোকৰ নিৰাপত্তাৰ দায়িত্ব ল’ব। ছয়জন বন্দুকধাৰীয়ে প্ৰাক্তন প্ৰধানমন্ত্ৰীগৰাকীৰ পৰিয়ালক সুৰক্ষা প্ৰদান কৰিব। ইয়াৰ উপৰিও তেওঁৰ বাসগৃহত সদায় দুজন নিৰাপত্তাৰক্ষী নিয়োজিত থাকিব।
উল্লেখযোগ্য যে ২০১৪ চনত প্ৰধানমন্ত্ৰীয়ে পদত্যাগ কৰাৰ পিছতো মনমোহন আৰু তেওঁৰ আত্মীয়ই এছ পি জিৰ সুৰক্ষা লাভ কৰি আছিল। কিন্তু, ২০১৯ চনত মোদী চৰকাৰে এছপিজিৰ ঠাইত ‘জেড প্লাছ’ ছিকিউৰিটি প্ৰদান কৰাৰ সিদ্ধান্ত লয়। যিটো কেন্দ্ৰীয় চৰকাৰে সময়ে সময়ে পুনৰীক্ষণ কৰে।
২০০৪ চনৰ পৰা ২০১৪ চনলৈ ভাৰতৰ প্ৰধানমন্ত্ৰী হিচাপে কাৰ্যনিৰ্বাহ কৰা মনমোহন সিঙৰ ৯২ বছৰ বয়সত মৃত্যু হয় । তেওঁৰ মৃত্যুৰ তিনি মাহৰ পাছতে মোদী চৰকাৰে তেওঁৰ পত্নীৰ নিৰাপত্তা হ্ৰাস কৰাৰ সিদ্ধান্ত লয়।
