ক’ৰ’নাৰ ভয়াৱহ সংক্ৰমনৰ পৰিস্থিতিত দেশব্যাপী সৃষ্টি হোৱা অৰ্থ সংকটৰ প্ৰভাৱ ৰাজ্যৰ বাতৰি কাকতৰ উদ্যোগৰ ওপৰতো পৰিছে৷
এনে সংকটৰ কালত গণতন্ৰৰ চতুৰ্থ স্তম্ভ সংবাদ মাধ্যমৰ উদ্যোগ সমূহক সকাহ দিয়াৰ লগতে সাংবাদিকৰ বাবেও আৰ্থ সাহায্য আগবঢ়াবলৈ ইতিমধ্যে গুৱাহাটী প্ৰেছ ক্লাব, আজু আদি সাংবাদিক সন্থাই অসমৰ মুখ্যমন্ত্ৰী সৰ্বানন্দ সোণোৱালৰ ওচৰত দাবী উত্থাপন কৰিছে৷
এনে পটভূমিত অল আসাম প্ৰেছ ক’ৰেচপণ্ডেন্ট য়ুনিয়ন চমুকৈ আপকুৰ প্ৰতিষ্ঠাপক সভাপতি তথা বোকাখাতৰ প্ৰবীন সাংবাদিক ভবেশ শইকীয়াই এই দাবীৰ প্ৰতি পূৰ্ণ সমৰ্থন জনাই ৰাজ্যৰ ক্ষুদ্ৰ বাতৰি কাকতকো সামৰি অৰ্থ সাহায্য প্ৰদানৰ দাবীত আজি মুখ্য মন্ত্ৰীলৈ স্মাৰকপত্ৰ প্ৰেৰণ কৰিছে৷
এলানি দাবী সম্বলিত এই স্মাৰক পত্ৰত প্ৰবীন সাংবাদিক গৰাকীয়ে চৰকাৰী পঞ্জীয়নভুক্ত স্থানীয়ভাৱে প্ৰকাশিত ক্ষুদ্ৰ বাতৰি কাকতবোৰেও এই সংকটৰ সন্মুখীন হৈছে বুলি মন্তব্য কৰিছে৷
সেয়ে প্ৰবীন সাংবাদিক গৰাকীয়ে এনে পৰ্যায়ৰ বাতৰি কাকতক প্ৰয়োজনীয় কাগজৰ যোগান ধৰা, স্থানীয় মহকুমা তথা জিলা পৰ্যায়ত প্ৰকাশ পাব লগা বিজ্ঞাপন প্ৰকাশৰ বাবে ক্ষুদ্ৰ বাতৰি কাকতক সুবিধা দিয়া, সাময়িক সকাহৰ বাবে কিছু আৰ্থিক সাহায্য প্ৰদানকে ধৰি কেইবাটাও দাবীৰে এখন স্মাৰক পত্ৰ আজি মুখ্য মন্ত্ৰীলৈ পঠাবৰ বাবে বোকাখাতৰ মহকুমাধিপতিৰ হাতত অৰ্পণ কৰে৷
