এক মৰ্মান্তিক পথ দুৰ্ঘটনাত ৭ জন লোকৰ মৃত্যু ঘটিছে। প্ৰয়াগৰাজৰ গংগা নদীত গা ধুই উভতি অহাৰ পথত সংঘটিত হয় এই দুৰ্ঘটনা। আটাইকেইজন অটোৰিক্সাৰে উভতি আহিছিল। এখন ট্ৰাকে নিয়ন্ত্ৰণ হেৰুৱাই অটোৰিক্সাখনত খুন্দা মাৰে। মধ্যপ্ৰদেশৰ ৰেৱা জিলাত বৃহস্পতিবাৰে বিয়লি সংঘটিত হয় এই ঘটনা।
আৰক্ষীৰ সূত্ৰ অনুসৰি সোহাগী উপত্যকাৰ সমীপৰ ৩০ নং ৰাষ্ট্ৰীয় ঘাইপথত দুপৰীয়া প্ৰায় ২:৩০ বজাত সংঘটিত হয় এই দুৰ্ঘটনা। উত্তৰ প্ৰদেশৰ প্ৰয়াগৰাজত গংগাত গা ধুই অটোৰিক্সাৰে উভতি আহিছিল ৮জন লোক। ৰাষ্ট্ৰীয় ঘাইপথত নিয়ন্ত্ৰণ হেৰুৱাই এখন ট্ৰাক বাগৰি পৰি অটোৰিক্সাত খুন্দা মাৰে। অটোৰিক্সাখন বিধ্বস্ত হৈ পৰে।
দুৰ্ঘটনাৰ ফলত থিতাতে মৃত্যু হয় ৪ জন লোকৰ। চিকিৎসালয়ত মৃত্যু হয় আৰু তিনিজনৰ। নিহতসকলৰ ভিতৰত চাৰিটা শিশু আৰু এগৰাকী মহিলাও আছে।
অঞ্চলটোৰ অতিৰিক্ত আৰক্ষী অধীক্ষক বিবেক লালে জনোৱা মতে, দুৰ্ঘটনাত আহত এজন ব্যক্তিক সংকটজনক অৱস্থাত উদ্ধাৰ কৰি চিকিৎসালয়ত ভৰ্তি কৰোৱা হৈছে।
তেওঁ কয় যে প্ৰয়াগৰাজত গা ধুই ৮জন লোক অট’ৰে মোৱাগাঞ্জৰ নাইগাৰীলৈ উভতি আহিছিল। ট্ৰাকখন বাগৰি পৰি তলত অটোখন থেতেলিয়াই পেলায়।
