তীস্তা নদীৰ প্ৰবল সোঁতৰ বাবে হালি পৰা ফিদাং দলংখন মেৰামতি কৰা হৈছে যদিও লাচুঙত আবদ্ধ হৈ থকা পৰ্যটকসকল আজি অৰ্থাৎ সোমবাৰেও গেংটকলৈ ঘূৰি আহিব নে নাই সেয়া নিশ্চিত নহয়।
বৰ্তমান লাচুঙত আবদ্ধ হৈ আছে ১২৭৬ জন দেশীয় পৰ্যটক। ইয়াৰে দুজন বিদেশী। আনহাতে, ১১২ জন বিদেশী পৰ্যটক লাচেনত আছে। মোবাইল যোগাযোগ বিচ্ছিন্ন হৈ পৰিছে। অৱশ্যে খাদ্য সংকট নথকাৰ বাবে সকলো সুৰক্ষিত।
যোৱা বৃহস্পতিবাৰৰ নিশাৰ পৰা সন্ধানহীন হোৱা আঠজন পৰ্যটকৰ আজিও কোনো তথ্য পোৱা নাই। তীস্তা ইমানেই ওফন্দি উঠিছে যে ৰাষ্ট্ৰীয় দুৰ্যোগ সঁহাৰি বাহিনীৰ সদস্যসকলে আজি উদ্ধাৰ কামো আৰম্ভ কৰিব নোৱাৰিলে। বৰষুণ, কুঁৱলী আৰু তীস্তাৰ প্ৰবল সোঁতৰ বাবে প্ৰশাসনিক কৰ্তৃপক্ষই গুৰুতৰ সমস্যাৰ সন্মুখীন হৈছে।
উত্তৰ ছিকিমৰ মংগনৰ আৰক্ষী অধীক্ষক সোণম ভূটিয়াই কয়, “পুৱাৰে পৰা উদ্ধাৰৰ কাম আৰম্ভ হৈছিল। দুপৰীয়াৰ পিছত তীস্তাৰ পানীৰ স্তৰ বৃদ্ধি পোৱাত আৰু আগুৱাই যোৱা সম্ভৱ নহ’ল। কেন্দ্ৰীয় বতৰ বিজ্ঞান বিভাগৰ মতে এই প্ৰতিকূল বতৰ তৎক্ষণাত নাইকিয়া নহয়। উত্তৰ ছিকিমত আৰু কেইদিনমান এনেদৰে বৰষুণ চলি থাকিব। সেইবাবেই এতিয়া আটাইতকৈ ডাঙৰ প্ৰত্যাহ্বানটো হ’ল আৱদ্ধ পৰ্যটকসকলক ঘূৰাই অনাটো।”
উত্তৰ ছিকিমত যোৱা কেইদিনমানৰ পৰা অবিৰতভাৱে বৰষুণ দি আহিছে। তীস্তা ইমানেই ওফন্দি উঠিছে যে প্ৰচণ্ড সোঁতে উটুৱাই লৈ যায় ফিদাং দলঙৰ এটা স্তম্ভ। একেদৰে লাচুঙৰ পৰা শংকালনলৈ যোৱা পথত ভূমিস্খলন সংঘটিত হৈছে। চুংথাং-লাচেন পথত ভয়ংকৰ পৰিস্থিতি। কমেও ৮ ঠাইত সংঘটিত হৈছে বিশাল ভূমিস্খলন। ভাৰত-চীন সীমান্তৰ সমীপৰ এটা বাইপাছ পথো অগম্য হৈ পৰিছে, কমেও চাৰিটা স্থানত ভূমিস্খলন সংঘটিত হৈছে।
আৰক্ষী অধীক্ষকগৰাকীয়ে কয় যে, “আৱদ্ধ হৈ থকা পৰ্যটকসকলক তেওঁলোকৰ হোটেলত থাকিবলৈ কোৱা হৈছে। সোমবাৰে পুৱা পুনৰ ফিডাং দলং পৰিদৰ্শন কৰা হ’ব। ইয়াৰ পিছত আৱদ্ধ হৈ থকা পৰ্যটকসকলক লাচুঙৰ পৰা গেংটকলৈ ঘূৰাই অনাৰ সিদ্ধান্ত লোৱা হ’ব। লাচেনৰ পৰা পৰ্যটকসকলক ঘূৰাই আনিবলৈ আৰু কেইদিনমান সময় লাগিব।”
